UVIÉU, 23 d'Ochobre (EUROPA PRESS)
La plataforma Asturies en Marcha, una de les entidaes organizadores de distintos actos convocaos pa protestar n'Uviéu coincidiendo cola selmana d'entrega de los Premios Príncipe d'Asturies, quiso salir al pasu del artículu publicáu esti fin de selmana pol alcalde d'Uviéu, Agustín Iglesias Caunedo (PP), que criticó qu'haya xente que pretenda 'atacar' los premios con estes movilizaciones. Dende Asturies en Marcha consideren que Caunedo busca afalar un estáu "d'escepción" na ciudá pa "criminalizar" una convocatoria pacífica.
"Les palabres d'Agustín Iglesias Caunedo suponen una maliciosa invitación a que les numberoses fuerces policiales esplegaes con cargu a la facienda pública carguen contra una concentración autorizada pol Tribunal Superior de Xusticia d'Asturies", esplicaron al traviés d'una nota prensa.
"¿Pretende coles sos palabres l'Alcalde rehabilitar la so imaxe sometida ante la monarquía dempués de les denuncies realizaes dende sectores conservadores pol aventón que supunxo la so ausencia mientres la primer visita a la ciudá per parte de la consorte del nuevu monarca, y que nun supo esplicar sinón con vagues escuses?", preguntáronse dende esti colectivu.
Asturies en Marcha discrepa sobre los presuntos bienes qu'aporta esta ceremonia al conxuntu de la sociedá. "Soportamos añu tres d'añu esta operación de marketing al serviciu de la institución real que pa nada mos paez una bendición sinón una desgracia mientres se caltenga'l so actual formatu, y abogamos porque si la sociedá asina lo desea se concedan reconocencies a aquelles persones que lo merezan pol so serviciu a les meyores sociales, a les artes y les ciencies, siempre qu'estos se decidan por xuraos exentos d'intereses y transacciones, y promovíos por instituciones neutrales", esplicaron.
Retruquen a Caunedo que'l "mayor dañu" que pue facese a la imaxe d'una sociedá vien motivada polos sos insoportables tases de paru, les sos precaries condiciones de trabayu, los sos indicadores de probeza y desnutrición infantil, xunto cola corrupción estructural y "l'arriquecimientu personal de los sos gobernantes que tan bien encarna'l partíu al que representa".
