UVIÉU, 23 Nov. (EUROPA PRESS) -
La Plataforma Feminista d'Asturies va salir esti sábadu día 25 de payares a la cai n'Uviéu pa denunciar les distintes violencies machistes y va xunise a la campaña #YoTambién, col doble oxetivu de facela visible y apoyala coles denuncies y esperiencies personales.
Dende la plataforma, al traviés d'una rueda de prensa celebrada esti xueves, convidaron a tola ciudadanía a dir a la manifestación que salir a les 12.30 hores del Teatru Campoamor.
"Convidamos a dir a la movilización con un cartelu que mente una o delles situaciones de violencia que pasasteis na vuestra vida y col hagstag #YoTambién", dixo Eva Irazu, integrante de la Plataforma, que destacó que l'impactu que ta teniendo esta campaña ye en parte pol apoyu que se recibió de persones conocíes nel mundu del cine o del arte.
Y ye qu'Irazu afirmó qu'esta campaña evidencia lo que munches muyeres lleven años y años manifestando, qu'existe violencia que sufren les muyeres por muncho que "la estratexa del machismu y el patriarcáu pase per tratar de dexar a les muyeres de mentiroses".
Otra de les integrantes de la Plataforma, Alejandra Matallanas, esplicó que'l sábadu próximu van realizar un percorríu per delles estatues y espacios d'Uviéu, faciéndoles partes de la campaña, colgando los sos propios cartelos de #YoTambién.
Al rematar van dexar tolos cartelos espuestos, na cai, dando muestra de les esperiencies y denuncies personales de les participantes.
