El Plenu municipal de Siero nun va tratar güei la elección del nuevu alcalde

UVIÉU, 9 de Marzu (EUROPA PRESS)

El Plenu Municipal del Conceyu de Siero que se va celebrar güei nun va valir a lo último pa escoyer nuevu alcalde del conceyu, según confirmaron fontes municipales a Europa Press. El puntu del orde del día relativu a la investidura del nuevu primer edil eliminóse "de manera preventiva".

L'anterior alcalde, el socialista, Juan José Corrales, presentó la so dimisión n'otru Plenu'l pasáu día 25 de febreru, en sufriendo un accidente de circulación y dar positivo nel control d'alcoholemia. Esta circunstancia abrió l'alderique sobre'l so sucesor como primer conceyal, y xeneró una resquiebra nel PSOE de Siero.

L'Agrupación Socialista del conceyu apostaba por qu'Ángel García ocupara'l cargu. Pero pa ello, teníen qu'arrenunciar, por cuenta de la so posición otros conceyales socialistes, Julio José Carretero Irazusta y Ángela Llende Arboleya, que nun lo ficieron. Asina, el PSOE decidió espulsalos del partíu. Pero puesto que la decisión nun yera firme, Carretero podía siguir siendo'l cabeza de llista de los conceyales socialistes. Ante esta situación, el PSOE presentó ayeri un recursu contencioso-alministrativu frente a la convocatoria de sesión plenaria nel Xulgáu de lo contencioso-alministrativu d'Uviéu.

Sicasí, el Plenu sí se celebrará, anque ayeri l'alcalde en funciones, Ángel García, anunciara la so suspensión. Finalmente nun se va tratar la investidura del nuevu alcalde, pero sí va haber otros puntos. D'esta manera, va tratase la toma de posesión de la nueva conceyala, Sonia Rodríguez Nosti, y el pase al grupu de Non Adscritos de los dos conceyales del PSOE que pidieron la baxa nel Grupu Socialista, Herminio Llamedo y Aurora Álvarez.

En declaraciones a Europa Press, Julio José Carretero caltuvo la posición que sostuvo estos díes y considera qu'él ha ser el qu'opte a l'alcaldía, por respetu a la "voluntá popular", dao que yera'l siguiente na llista electoral del PSOE.