El Plenu de Xixón apoya la oficialidá del asturianu y va encamentar al Principáu a la reforma del Estatutu

Pleno Ayuntamiento de Gijón.
EUROPA PRESS
Actualizado: viernes, 10 noviembre 2017 9:04

El PSOE defende nun forciar un calendariu mentes que XsP alvierte de que van siguir lluchando pa que la reforma vaiga a más ritmu

XIXÓN, 10 Nov. (EUROPA PRESS) -

Los grupos de Xixón Sí Puede (XsP), IX, PSOE y Foru nel Conceyu de Xixón aprobaron esti xueves nel Plenu una proposición d'apoyu a la oficialidá del asturianu y qu'encamienta al Principáu a principiar la reforma del Estatutu d'Autonomía pa que esto sía posible, colos votos en contra de PP y Ciudadanos.

El PSOE dio finalmente l'apoyu a la iniciativa conxunta de XsP y IX depués d'aceptar estos últimos retirar el marcu temporal afitáu p'aprobar la oficialidá nesta llexislatura. A pesar de que los socialistes primeramente presentaron una enmienda pa que se vinculara esta reforma del Estatutu a la reforma constitucional prevista, el PSOE y los grupos proponentes llegaron a un alcuerdu pa que nun figure fecha concreta.

Per otru llau, el portavoz del Grupu Municipal d'IX, Aurelio Martín, consideró que ye'l momentu pa poner en marcha un procesu de diálogu y de consensu políticu y social pa poner en marcha la oficialidá del asturianu.

Coles mesmes, aludió a un estudiu sociolóxicu de recién, onde'l 53 por cientu de los encuestaos ta a favor de la oficialidá del asturianu y namás el 18 por cientu en contra, mentes qu'al restu nun-yos parez una cuestión importante. Na so opinión, la so oficialidá ye más de discutiniu políticu que social.

Apostó, nesti sentíu, por consiguir una mayoría política y social actualmente a favor de la oficialidá pa que l'asturianu tenga'l mesmu estatus que'l PP defende pal gallegu, remarcó.

Sobre la enmienda presentada primeramente pol PSOE pa retrasar el procesu y esperar a que se resuelva la reforma constitucional, Martín consideró que ye un plazu "indefiníu abondo" y diz bien poco del autogobiernu d'Asturies y de l'autonomía de les fuercies polítiques autonómiques que-y ye propia.

Per otru llau, el portavoz socialista, José María Pérez, reconoció que na resolución del congresu autonómicu de la FSA planteó avanzase na oficialidá del asturianu, dalgo a debatir nel marcu de la reforma del Estatutu d'Autonomía.

De la mesma, matizó que'l secretariu xeneral nuevu de la FSA, Adrián Barbón, yá matizó que la reforma del Estatutu d'Autonomía nun daba tiempu a facela nesta llexislatura. Incidió, coles mesmes, en que con rellación a la reforma constitucional los socialistes yá fixeron apueste por ameyorar el réxime de la cooficialidá como llingües del Estáu ensin qu'haya discriminación d'usu.

NUN FORCIAR UN CALENDARIU

Nesta llinia, Pérez repitió que dende'l PSOE apuesten por reformar l'Estatutu d'Autonomía nel marcu de la reforma constitucional, polo qu'encamentó a IX a nun forciar un calendariu porque nun figura en nengún compromisu electoral o de Gobiernu.

Foru, al traviés de la conceyala Montserrat López, aportunó na necesidá d'un consensu social y abogó por sacar alantre midíes pa evitar que muerra la llingua. Ensin la so protección, esta va tar condenada al fracasu como vehículu de comunicación de tola sociedá, según ella.

Ye por esto, que reivindicó qu'avanzar na so oficialidá ye "asumir la construcción del nuestru progresu". López, que citó un testu del ilustráu xixonés Gaspar Melchor de Xovellanos sobre la llingua, animó a que l'asturianu sía vistu como derechu y non imposición y ver hacia qué modelu se quier avanzar.

Eso sí, remarcó que Foru cree que'l debate sobre la oficialidá del asturianu va tener que dir acompañáu de midíes y los recursos económicos necesarios. Recordó, amás, que nel programa de Foru de 2015 figuraba yá midíes de defensa del asturianu, amás del avanzar nun consensu pa reformar l'Estatutu d'Autonomía y incluir la so oficialidá.

El portavoz de XsP, Mario Suárez, valoró que s'algamara un consensu mayoritariu nel Plenu sobre la oficialidá del asturianu. Sicasí, matizó que dende'l so partíu van siguir lluchando pa que los ritmos sían "más rápidos" de los que quieren otros grupos.

COSTU ECONÓMICU

El portavoz del Grupu Municipal de Ciudadanos, José Carlos Fernández Sarasola, recalcó que l'asturianu nun ye una llingua "desprotexida", porque tán garantizaos los derechos tanto de los que lo falen como los que non. Al so xuiciu, tendría munches desventaxes pa quien nun lo fala si s'aprueba la oficialidá, pola obligatoriedá de conocelo, a lo que sumó'l costu. Pa él, nun se trata d'una demanda real de la sociedá asturiana.

Nel casu del PP, el conceyal Pablo González, coincidió en que la llingua nun ye patrimoniu de nengún partíu, pero l'asturianía tampoco nun se reparte en función del apoyu a esta. Apostó, nesti sentíu, por defender la voluntariedá del so usu.

La oficialidá obliga "a un montón" d'obligaciones, según González, a lo qu'añadió'l costu económicu que supón. Pa él, sería abondo con ameyorar la llei actual de protección y normalización del asturianu. Nesta llinia, apuntó qu'hai normativa de sobra pa protexelo de forma que los ciudadanos caltengan "l'asturianu real" y el de l'Academia, "en llibertá". Acusó a XsP y IX, coles mesmes, d'envolvese na bandera del asturianu cuando tán dexando que caigan horros y paneres. Amás, incidió en qu'hai distintes variedaes d'asturianu.

"SOCIALMENTE ASUMIBLE"

Nel, enantes de los grupos municipales, faló'l presidente de l'Academia de la Llingua Asturiana (ALLA), Xosé Antón González Riaño, qu'aludió a les conversaciones que tán teniendo colos grupos políticos de cara a promover la oficialidá del asturianu.

Según González Riaño, hai un constatáu apreciu y consideración de que la llingua tien calter tresversal, amás de ser patrimoniu cultural de tolos asturianos al marxe d'ideoloxíes polítiques.

Al so xuiciu, ye una anomalía constitucional que nun gocie d'oficialidá. Nesti sentíu, al que diz que nun ye necesaria la so oficialidá por tener protección llegal, preguntó-y si ye que seis autonomíes van tar enquivocaes.

Alvirtió, amás, que la non oficialidá supón una pérdiga de recursos económicos del Estáu y una discriminación del profesoráu. Tamién remarcó que lleven cuasi 40 años na codificación de la llingua, con presencia na enseñanza y nos medios de comunicación. Por esti motivu, consideró que la oficialidá ye "socialmente asumible" dende un puntu de vista cultural. Amás, resaltó que n'Asturies toos tenemos una enorme responsabilidá en facer que la Llingua nun muerra, pero más l'Alministración, a la so manera de ver.

Asturianu ofrecido por