UVIÉU, 31 de Xunetu (EUROPA PRESS)
Podemos Asturies y Xixón Sí Puede alvirtieron esti vienres que la Fiscalía Anticorrupción señaló nel so últimu informe posibles responsabilidaes, lo mesmo colos miembros del Conseyu d'Alministración del puertu d'El Musel como cola empresa Tudela Veguín y el Grupu Masaveu. El documentu pide la imputación del exacalde de Carreño, Ángel Riego, lo mesmo que de dellos representantes de la cementera y de la Unión Temporal d'Empreses (UTE) Dique Torres.
La vicealcaldesa d'Uviéu y abogada personada nesti procesu, qu'investiga les posibles irregularidaes vinculaes colos sobrecostos de l'ampliación de puertu xixonés, Ana Taboada, informó d'estes cuestiones nuna rueda prensa. Comparecieron tamién la conceyala de Xixón Sí Puede, Nuria Rodríguez, y el secretariu xeneral de Podemos Asturies, Daniel Ripa.
Esti últimu señaló la del exalcalde, Ángel Riego, como'l primer pidimientu d'imputación qu'afecta a un miembru del Conseyu d'Alministración (foilo hasta l'añu 2015). Dio a entender que podría nun ser la última y que pue haber "relevancia penal" nes distintes actuaciones.
ACTUACIONES CONTRADICTORIES
Del exprimer edil, la Fiscalía observó actuaciones "contradictories". Ente otres coses, esplica qu'apoyó nel Conseyu l'axudicación de les obres d'ampliación del puertu, qu'afectaben directamente a la cantera d'El Perecil, que darréu nun pudo utilizase porque'l Conceyu de Carreño suspendió l'otorgamientu de llicencies. La Fiscalía cree que se trataría d'un delitu de prevaricación.
Nesti puntu, Nuria Rodríguez xustificó la negativa de Xixón Sí Puede a llegar a un acuerdu d'investidura como alcalde del candidatu socialista al Conceyu xixonés, José María Pérez, basándose en que "yá hai una persona imputada" del PSOE, y dando por fechu que va haber más responsabilidaes polítiques.
Per otra parte, xunto con riego, la Fiscalía pide que s'impute al xerente de la UTE Dique Torres, David López Navarrete (primeramente citáu como testigu), al apoderáu que robló los contratos cola UTE en representación de Tudela Veguín, José Antonio Muñiz, al xerente qu'actuó en representación de la UTE Dique Torres, Juan Miguel Pérez Rodríguez, y al posterior xerente de la UTE, Isidro Alonso Sierra, en dexando la xerencia Juan Miguel Pérez Rodríguez.
CONTRATOS ENTE TUDELA Y LA UTE
Según esplicó Taboada, la Fiscalía que afondar nes relaciones ente la UTE y Tudela Veguín. L'abogada afirma qu'existe la sospecha de que Dique Torres efectuó obres "sin facturar" o con importes "non declaraos" en Tudela Veguín, esto ye, "inversiones", o lo que darréu Ripa definió como "pagos n'especies". "Formaba parte del acuerdu d'envíu de materiales pétreos" de la cantera de Tudela Veguín, según esplicó la videalcaldesa d'Uviéu. Obres que, según estimó a partir de les declaraciones realizaes hasta agora, podríen superar los 80 millones d'euros.
Por esti asuntu, esplicó la lletrada, la Fiscalía solicita que s'envíen tolos acuerdos roblaos ente Tudela Veguín y Dique Torres o les sos empreses, asina como "otra pericial sobre la determinación de dellos materiales". Señálase amás el "posible tapecimientu per parte de l'Autoridá Portuaria documentación, o la ellaboración de documentos ad hoc".
Taboada afirma que la Fiscalía amplía la investigación porque considera tamién que puen existir los delitos de "fraude y exacciones illegales, falsedá en documentu oficial y fraude a la Facienda Pública". Coles mesmes, esplica que s'alude a posibles "falses informaciones de la UTE sobre'l númberu de tresportes", polo que se solicita "la testifical de los investigadores de la OLAF", ante esti descontrol absolutu sobre'l material qu'entraba, "el pesaxe y el duplicáu de camiones".
