MADRID, 29 d'Ochobre (EUROPA PRESS)
El censu puestu en marcha por Podemos esti branu algamó esta selmana les 210.000 persones inscrites. Esta cifra supera yá en dellos miles a los casi 200.000 militantes colos que cuenta'l PSOE --según la última cifra oficial de xunetu--, y dexa atrás a los 36.000 d'IU, pese a que tovía permanez alloñada de los más de 800.000 del Partíu Popular.
Anque'l partíu evita falar de 'afiliaos' o 'militantes' a la hora de referise a los inscritos nel citáu censu, namás les persones que se rexistraren nél tienen el derechu de participar nes votaciones que tán teniendo llugar a lo llargo de l'asamblea constituyente que celebra la formación estos meses, tanto pa configurar el modelu de partíu como pa escoyer a les persones que van formar parte de los órganos de dirección de la formación.
Nesti sen, la figura del 'inscritu' en Podemos podría asimilase a la de los 'militantes' socialistes, que, según esplica'l PSOE na so web, son aquéllos que, tres afiliase, puen asistir "con voz y votu" a les xuntes y asamblees, "decidir na ellaboración de los programes electorales, na vida interna del partíu y la elección de candidatos y candidates, tanto pa procesos electorales internos como esternos".
Amás, les persones que s'inscriben en Podemos tienen que dar el so consentimientu a una serie de "condiciones xenerales", ente les que figura l'aceptación espresa de los estatutos del partíu y los acuerdos éticos, organizativos y políticos qu'apruebe l'Asamblea Ciudadana y demás órganos del partíu, lo mesmo que de los métodos de participación y les fórmules de decisión que "lexítimamente s'establezan".
"Al rellenar y enviar el formulariu d'inscripción l'interesáu va pasar a ser miembru de Podemos y va ser titular de los derechos y obligaciones reconocíos pola llexislación española a "tolos inscritos en partíos políticos", señala'l testu sobre les condiciones xenerales d'inscripción que los interesaos tienen qu'aceptar.
