UVIÉU, 20 Jun. (EUROPA PRESS) -
Podemos Asturies pidió al secretariu xeneral de la FSA, Adrián Barbón, que "llame al orde" a los senadores asturianos del PSOE por votar contra una enmienda pa incluyir una ayuda económica del Estáu pa l'Academia de la Llingua.
Asina lo afirmó'l responsable de Derechos Llingüísticos de la formación, Lluís Miguel Orviz, que calificó de "sucesu políticu llamentable" que María Luisa Carcedo y Vicente Álvarez Areces votaren en contra de conceder esta ayuda.
"Siempre reivindiquemos que'l Senáu tien que ser una cámara de representación territorial y non un campusantu d'elefantes, como comprobemos que ye esta selmana, cuando unos representantes nel so fin de ciclu políticu antepunxeron los sos intereses particulares a los intereses de les asturianes y los asturianos", indicó.
PP y Foru Asturies tamién votaron en contra de la enmienda al proyectu de Presupuestos Xenerales del Estáu (PXE) pa 2018 presentada por Compromís pa dotar con 100.000 euros a l'Academia de la Llingua Asturiana, única institución llingüística del Estáu que nun cuenta con una partida nos presupuestos.
Pa Orviz, de PP y Foru "nada cabía esperar", pero mostróse esmolecíu y atristayáu "fondamente" pol votu negativu de Carcedo y d'Areces "al asitiase en contra de la llinia favorable al asturianu que caltién l'equipu qu'encabeza Adrián Barbón".
