UVIÉU, 7 de Marzu (EUROPA PRESS)
La nueva xeneración de poetes y narradores en llingua asturiana presenta una bona muestra de la so producción nel últimu númberu de la revista lliteraria Formientu, editada por Xareos Xestión Cultural.
La publicación, qu'algama yá los sos diez años de vida, incorpora nesta ocasión a un autor portugués qu'escribe en mirandés. Trátase de Tiégui Alves, residente en Burdeos, y que presenta dos muestres de la so producción poética.
Moisés Cima, Claudia Elena Menéndez, Francisco Priegue, Andrés Astur Treceño, Naomi Suárez o Berto Cla son otros poetes incluyíos nesti últimu númberu, na so mayor parte nacíos nos años 90. Marcos Salazar, Alba Carballo, Alicia Cortina y Xurde Álvarez Antón, ente otros, apurren les sos creaciones a la estaya de narrativa.
Una de les autores incluyíes na estaya de poesía ye Raquel F. Menéndez, protagonista involuntaria del incidente provocáu'l pasáu mes d'ochobre pol fíu del catedráticu Emilio Alarcos, Miguel Alarcos. Tres una llectura de la poeta en llingua asturiana, nun actu de la cátedra Emilio Alarcos, el profesor universitariu tachó la 'llingua' de "inventu de filólogos paletos".
Nel 'Entamu' d'esti númberu de Formientu, el so director, Inaciu Galán, refirióse a esti asuntu. Critica a sectores "bien minoritarios" que tovía caltienen "prexuicios llingüísticos yá superaos polos asturianos y que tanto condicionaron la vitalidá y l'autoestima de munches xeneraciones".
