La Policía ataca mientres la nueche a los 'indignaos' acampaos en delles ciudaes turques

MADRID, 10 de Xunu (EUROPA PRESS)

La Policía atacó dellos de los campamentos llevantaos polos 'indignaos' en delles ciudaes turques en solidaridá cola acampada de la plaza Taksim d'Istambul, epicentru de les protestes que solmenaron el país mientres los dos últimes selmanes.

N'Ankara los policíes emplegaron cañones d'agua y gases llarimosos p'aventar a los manifestantes aconceyaos na plaza Kizilay. Los axentes forzaron el desagospiu de la plaza, informa'l diariu 'Hurriyet'.

Nel parque Kugulu, tamién na capital turca, los axentes esmangaron les tiendes de campaña que llevantaren los 'indignaos' en solidaridá colos de la plaza Taksim. Nun primer momentu los manifestantes aguantaron les cargues policiales, pero a lo último los axentes llograron tomar el parque y quitar les tiendes.

Na ciudá d'Adana, nel sur del país, los policíes atacaron a un grupu de manifestantes nel barriu d'Akkapi cuando intentaben sumase a otros 'indignaos' a los que taben urriando y acosando simpatizantes del gobernante Partíu Xusticia y Desarrollu (AKP). Los axentes aventaron a los manifestantes con cañones d'agua y gases llarimosos.

Tamién se produxeron manifestaciones mientres la nueche n'Edirne, cerca de la frontera con Grecia y Bulgaria, onde colaron unos 2.000 manifestantes, y n'Esmirna, con unos 10.000 participantes na protesta.