La Policía colombiana tien "evidencies" de qu'a los dos españoles secuestráronlos indíxenes

BOGOTÁ/UVIÉU, 22 de Mayu (EUROPA PRESS)

El dispositivu policial esplegáu na rexón de La Guajira, nel norte de Colombia, alcontró "delles evidencies" qu'apunten a qu'a los dos españoles secuestraos el vienres pasáu nesta zona garráronlos indíxenes, informaron a Europa Press fontes policiales.

Les fontes consultaes indicaron que los investigadores creen qu'a los dos españoles, Ángel Sánchez Fernández y Concepción Marlaska Sedano, "mui probablemente" secuestráronlos "dellos indíxenes" que los tendríen zarraos en dalguna de les "rancheríes" (pequeñes cases de folla y paya) próximes al llugar nel que'l so vehículu apaeció abandonáu.

P'avanzar nes indagaciones, los mandos policiales xestionaron con "les autoridaes llocales", incluyíu l'alcalde d'Uribia, la convocatoria pa mañana, xueves, d'una reunión de la Xunta Mayor de Palabreros, un foru al qu'asisten los vieyos que lideren caúna de les comunidaes indíxenes d'esa zona de La Guajira.

Les fontes consultaes por Europa Press sorrayaron la importancia de contar col apoyu de la comunidá indíxena pa llograr resolver el secuestru y recordaron que tol qu'entra nos sos territorios tien que contar cola so autorización, incluyida la Policía. En casu d'entrar nos sos terrenes sin la correspondiente autorización, los indíxenes cobren esa "ofensa" d'unu o otra manera. "La mesma Policía tien que pagar la ofensa", afirmaron.

Los mandos policiales van asistir al alcuentru apoyaos por traductores, por culpa de qu'algunos de los líderes indíxenes nun saben falar n'español y namás s'espresen na so llingua, el wayuunaiqui. L'apoyu d'estos líderes comunitarios, según les mesmes fontes, va suponer una meyora na investigación tanto porque va dar pasu a la collaboración directa de los indíxenes na busca, como pol fechu de que va suponer que los investigadores nun van tener qu'encarar torgues nestos territorios.

Les fontes consultaes mostráronse confiaes en que la xunta colos palabreros va permitir avanzar na busca de los dos españoles porque "ellos son les autoridaes nes rancheríes".

Los investigadores del secuestru, qu'esplegaron "grupos d'Intelixencia" na zona, nun creen que'l raptu fuera obra de les Fuerces Armaes Revolucionaries de Colombia (FARC) porque la guerrilla nun tien malpenes presencia en La Guajira, anque sí al otru llau de la frontera con Venezuela. "Ellí nun faen presencia les FARC", aseguraron.

Na zona de La Guajira sí qu'existen dellos "grupinos d'indíxenes" que cometen "atracos y robos" y que podríen ser los autores del secuestru de los españoles.

El dispositivu policial esplegáu pa intentar alcontrar a Fernández y Sedano ta integráu por axentes de les Policías de Guajira y Nacional de Colombia, cuerpu esti últimu qu'envió a especialistes del grupu contra la estorsión y el secuestru Gaula.