SÍDNEY, 19 d'Avientu (EUROPA PRESS)
La muyer qu'apaeció firida nuna vivienda de Cairns xunto con ocho neños muertos sería la madre de siete d'ellos y sería l'autora del asesinatu múltiple de tolos menores d'edá, según aseguró una fonte policial consultada pol diariu 'The Australian'.
La fonte aseguró que la muyer mató a los sos siete fíos y al otru neñu, que ye un familiar, y depués intentó quitase la vida. La muyer apaeció inconsciente y treslladáronla d'urxencia a un hospital, nel qu'agora permanez ingresada.
La Policía decretó'l zarru de la zona na que s'alcuentra la vivienda y entamó una investigación de lo asocedío. Oficialmente, la Policía tovía nun nomó nengún sospechosu d'esti crime que conmocionó al país díes dempués de qu'esti martes un supuestu clérigu iranín secuestrara a 17 persones nuna cafetería de Sídney, un crime que se saldó con trés muertos, incluyíu l'asaltante.
L'inspector de la Policía de Cairns Bruno Asnicar confirmó que la muyer firida ye la madre de siete de los ocho neños finaos, según informa'l periódicu 'The Age'. "La muyer que ta nel hospital ye la madre de la mayoría de los neños que morrieron. Nun se llevó a cabu tovía la identificación. Creemos que ye la madre de siete de los neños", esplicó.
