La policía detién a otres dos persones pola so presunta relación col atentáu de Londres

LONDRES, 23 de Mayu (EUROPA PRESS)

Les fuerces de seguridá britániques detuvieron esti xueves a un home y a una muyer de 29 años pola so presunta relación col ataque cometíu'l miércoles nel sureste de Londres y nel que perdió la vida'l militar Lee Rigby, según informó Scotland Yard nun comunicáu.

Los últimos arrestos produxéronse mientres los rexistros y operaciones llevaos a cabu en Londres pola unidá antiterrorista de la Policía. Les dos persones tán catalogaes como sospechoses de "conspirar pa cometer asesinatu" y treslldáronles a dependencies policiales del sur de la capital inglesa.

La Policía nun reveló los nomes de los últimos deteníos nin nengún detalle sobre la so procedencia, más allá de qu'a la muyer "detuviéronla nuna zona residencial del sur de Londres".

Con estos arrestos, sumen cuatro les persones que s'alcuentren deteníes pol so posible relación col asesinatu de Rigby, apuñaláu en plena cai nel barriu de Woolwich. Los presuntos autores materiales del crime, dos homes de 22 y 28 años, resultaron abatíos pola Policía y alcuéntrense ingresaos en dos hospitales "en situación estable". Según Scotland Yard, les sos vides nun cuerren peligru.

Les autoridaes autorizaron esti xueves el rexistru de seis viviendes, cinco d'elles en Londres --trés nel sur, una nel este y una nel norte-- y la restante en Lincoln. Les investigaciones siguen dientro d'esti operativu "grande, complexu y rápidu", como lo calificó la Policía.

Les fuerces de seguridá caltienen abiertes delles llinies d'investigación y, según Scotland Yard, los trabayos avancen a bon ritmu. Dende que se produxera'l crime, el miércoles de tarde, les autoridaes "recoyeron información de testigos y redes sociales" y entamaron un "meticulosu" analís de les imaxes captaes poles cámares de seguridá de la zona.

Coles mesmes, un equipu d'espertos trabaya nel llugar de los fechos pa examinalu de "forma detallada" y recoyer les máximes pistes posibles.

La Policía pidió la collaboración ciudadana pa tratar de llograr nuevos datos sobre los autores del ataque y les circunstancies en qu'ésti se produxo. Les autoridaes caltienen abierta una llinia d'atención telefónica y solicitaron a los que cuenten con vídeos o fotografíes de los fechos qu'envíen el material a Scotland Yard. "Va tratase cola máxima confidencialidá", prometió.