ISTAMBUL, 28 de Xunu (Reuters/EP)
El primer ministru de Turquía, Binali Yildirim, confirmó'l nuevu balance de víctimes tres l'atentáu múltiple asocedíu a última hora d'esti martes nel aeropuertu Ataturk d'Istambul, elevando la cifra de muertos a 41, tal como indicó l'axencia británica Reuters.
Yildirim aseguró qu'ente los firíos --el so últimu balance foi de más de 200, según la cadena de televisión turca Haberturk-- alcuéntrense dalgunos n'estáu grave, polo que la cifra de víctimes mortales podría dir aumentando mientres les próximes hores. Según confirmó una fonte al diariu 'Daily Sabah', son seis los firíos graves.
Nengún grupu reivindicó pel momentu l'autoría de los ataques, pero les autoridaes turques abarrunten de que l'autodenomináu Estáu Islámicu podría tar detrás d'ellos.
El gobernador d'Istambul, Vasip Sahin, confirmó que fueron trés los suicides que llevaron a cabu los ataques n'Ataturk, el mayor aeródromu de la ciudá turca.
El ministru de Xusticia, Bekir Bozdag, esplicó que polo menos unu d'ellos abrió fueu con un fusil Kalashnikov antes d'españar los esplosivos, según 'Hurriyet'. Un testigu indicó a la cadena CNN Türk qu'escuchara disparos dende l'aparcamientu del aeropuertu.
Numberoses ambulancies tuvieron que disponese na zona, ya inclusive dellos taxis tuvieron tresportando firíos a los hospitales. Mientres, el primer ministru turcu ordenó un gabinete de crisis en redol al incidente.
El responsable de Media Lluna Colorada, Kerem Kinik, aseguró que de momentu nun fai falta donación de sangre nos hospitales, polo que pidieron a la población qu'evite xenerar tráficu nel entornu de los centros médicos. Sicasí, si quisieren facelo, encamentó-yos averase a cualquier centru de donación sanguineu móvil de la ciudá.
VUELOS
L'accesu al aeropuertu Ataturk quedó bloquiáu y tamién s'anunciaron esvíos y cancelaciones nos vuelos, magar les aerollinies nun determinaron tovía l'algame d'estes suspensiones nin hasta cuándo podríen estendese.
Un voceru de Turkish Airlines esclaró que los aviones van poder siguir aterrizando hasta les 00.10 (una hora menos na España peninsular), mientres que yá s'atayaron tolos despegues previstos pa esta nueche, informa l'axencia de noticies Reuters.
FOLA D'ATENTAOS
El segundu aeropuertu d'Istambul, el de Sabiha Gokcen, yá sufrió un ataque n'avientu del 2015, nun atentáu nel que perdió la vida una muyer del personal de caltenimientu y que reivindicó'l grupu armáu Ferres de la Llibertá del Kurdistán (TAK).
Istambul tamién foi escenariu esti añu de dellos atentaos, ente ellos dos cometíos por terroristes suicides en delles zones turístiques y de los que les autoridaes culparon al grupu yihadista Estáu Islámicu. N'Ankara tuvieron lugar dos ataques con coche bomba reivindicaos por milicianos curdos.
