MADRID, 19 de Xunu (EUROPA PRESS)
La Policía Metropolitana de Londres confirmó que polo menos una persona morrió y una decena resultaron firíos tres atropellales una furgoneta a la salida de la mezquita de Finsbury Park, nel norte de la capital británica de Londres.
Scotland Yard, qu'informó de qu'un vehículu atropelló esti domingu a última hora a un grupu de transeúntes na cai Seven Sisters, xunto a una de les mezquites de la zona, señaló que'l conductor del vehículu, de 48 años, ta deteníu.
El Serviciu d'Ambulancies de Londres, qu'indicó qu'a ocho firíos treslladáronlos a trés hospitales de la zona, señaló qu'otres dos persones recibieron atención nel llugar de los fechos por firíes leves.
El Conseyu Musulmán de Reinu Uníu (MCB) esplicó que los transeúntes afectaos, que taben na cai Seven Sisters, na que se cortó'l tráficu, acababen de salir de la mezquita del parque Finsbury, onde taben rezando pol Ramadán, cuando los arrollaron deliberadamente.
El secretariu del MCB, Harun Khan, condenó l'atropellu y espresó que se trata d'una "violenta muestra d'islamofobia". "Toi en shock polo asocedío y siento rabia", afirmó.
Dellos testigos esplicaron que dientro del vehículu había polo menos trés persones. La Policía, que ta inspeccionando la zona pa topar posibles cómplices, abrió una investigación nesti sen, que ta coordinando la unidá antiterrorista de Scotland Yard.
Per otra parte, el líder del Partíu Llaborista británicu, Jeremy Corbyn, manifestó que s'alcuentra "dafechu conmocionáu" pol incidente nel norte de Londres.
Per otra parte, l'alcalde de Londres, Sadiq Khan, indicó al traviés de la so cuenta de Twitter les fuerces de seguridá y los servicios d'emerxencia tán trabayando para esclarar lo asocedío.
