UVIÉU, 29 de Xunetu (EUROPA PRESS)
El diputáu del PP na Xunta Xeneral d'Asturies, Matías Rodríguez Feito, acusó esti miércoles al Gobiernu autonómicu d'aplicar el Plan d'Incendios(Infopa) con "neglixencia y retrasu", al respective de los fueos declaraos nel suroccidente asturianu, especialmente nel conceyu de Tinéu, d'onde ye vecín el parlamentariu.
Nuna rueda prensa, Feito criticó duramente al director xeneral d'Interior, José Luis Villaverde, por afirmar "va dos díes que los incnedios taben controlaos, cuando toos víamos que nun yera asina".
Según Feito, "Tinéu lleva quemando dende'l domingu, polo que pensamos que daqué más pudo facese pa evitar evacuaciones como les del pueblu de Castañera". Na so opinión, l'actuación del Gobiernu asturianu "pon n'evidencia la escasa capacidá de reacción con solvencia" de l'Alministración autonómica, "que foi mostrando a cuentagotes el so apoyu a los vecinos".
El parlamentariu consideró qu'esti miércoles el presidente autonómicu "tendría que tar al pie del monte, escuchando a estos vecinos", en llugar de participar nel actu de toma de posesión de los sos conseyeros.
Esta falta de "dilixencia", que "nun pasó inalvertida", va motivar que'l Grupu Popular na Xunta Xeneral presente les correspondientes entrugues en sede parlamentaria pa "delimitar responsabilidaes". Sicasí, pidió que pel momentu, y una vez que les quemes queden estinguíes, se realice una valoración de los daños y habilítense les partíes presupuestaries necesaries pa procurar les ayudes a los vecinos afectaos, y pa recuperar les zones dañaes poles llames.
Tamién demandó una investigación detallada de les causes d'estos fueos porque, según el diputáu, declaráronse "con macabra harmonía", polo que, na so opinión, "nun fueron por casualidá". De la mesma manera, reclamó una reorganización de los servicios d'emerxencies que "carecen una situación caótica", con "parques desatendíos" y atenciones efectuaes con "menos de trés efectivos". Asina, pidió una reestructuración y que se cubran les places vacantes.
