El PP cree que l'alcuerdu pa construyir el Palaciu de Xusticia podría tar yá anuláu

L'Ayuntamientu d'Uviéu nun recibió nenguna solicitú d'autorización urbanística pal proyectu

UVIÉU, 9 de Marzu (EUROPA PRESS)

La diputada del PP na Xunta Xeneral del Principáu d'Asturies (JGPA), Ana Barrientos, dixo güei que l'acuerdu ente'l Gobiernu del Principáu d'Asturies y l'empresa Jovellanos XXI podría tar yá "sin efectu". Barrientos basó la so argumentación na cláusula decimocuarta del acuerdu soscritu ente l'Alministración rexonal y l'empresa que señala que "el non llogru de la financiación necesaria nel plazu de cinco meses dende la firma del presente acuerdu va dexalu sin efectu".

Puesto que l'alcuerdu firmóse'l 30 de xunetu, pasando'l mentáu plazu, y que, según el PP, el mesmu presidente del Principáu, el socialista Vicente Álvarez Areces, reconoció públicamente que tovía nun había financiación, los 'populares' mostraron les sos dudes sobre'l futuru del proyectu.

Espunxéronlo asina nuna rueda de prensa ufiertada n'Uviéu por Ana Barrientos y el conceyal d'Urbanismu del Conceyu d'Uviéu, Alberto Mortera. Barrientos dixo que'l Grupu Popular na Xunta Xeneral va apelar al Gobiernu pa clarificar tou esti asuntu.

Tanto Barrientos como Mortera calcaron na necesidá de la construcción d'un Palaciu de Xusticia n'Uviéu y acusaron a los socialistes de "embaucar" a empresarios de "reconocíu prestixu". Asina, Mortera mostró na rueda de prensa una fotografía de febreru de 2009 nel qu'apaecíen la vocera socialista nel Conceyu d'Uviéu, Paloma Sainz, el secretariu xeneral de l'Agrupación Socialista d'Uviéu, Alfredo Carreño, y el responsable de la empresa Jovellanos XXII, propietaria de la parcela d'El Vascu, Jacobo Cosmen, el día nel qu'anunciaben que se diba facer el proyectu.

A xuiciu de Mortera, el Palaciu de Xusticia supón un "olvidu" más del Gobiernu del Principáu d'Asturies y un "nuevu compromisu incumplíu, como'l de la Llosa de Santuyano". Tachó de "insolvente" la xestión d'Areces y sorrayó la so "perda de credibilidá".

Amás, el conceyal d'Urbanismu uvieín dixo que nel consistoriu naide solicitó, a día de güei, llicencia urbanística alguna pal proyectu del Palaciu de Xusticia.

L'acuerdu ente'l Principáu y Jovellanos XXI señalaba que la empresa construyiría la instalación y que'l Principáu va roblar un contratu d'arrendamientu d'una duración de 30 años, con un derechu a compra. Esti acuerdu criticáronlu fuerces polítiques, incluyíu'l sociu de Gobiernu de los socialistes n'Asturies, IU, que dixo que la fórmula implica un mayor costu para les arques públiques y que llegó a denunciar el casu ante la Unión Europea, al entender que va en contra de la lexislación de contratación pública, que riquería un concursu.

Preguntada sobre si creía que l'acuerdu adautábase a la llegalidá, Barrientos refugó afondar sobre l'asuntu y llendóse a dicir que "de normal estes coses fáense por concursu".

Mortera, pela so parte, dixo que "nun ye normal qu'un serviciu públicu como'l de la Xusticia dependa de si un terceru, nesti casu una empresa, llogra financiación o non". Acusó al Gobiernu de "xugar colos asturianos" y de realizar "exercicios insanos de propaganda" con tol referente al Palaciu de Xusticia.