UVIÉU, 13 Ago. (EUROPA PRESS) -
El diputáu rexonal del Partíu Popular, Rafael Alonso, denunció esti llunes el "penosu" estáu de la rede ferroviaria de cercaníes n'Asturies, y apuntó que la llinia Collanzo-Morea "ye un claru exemplu" d'esa situación.
"Por problemes coles máquines, los vecinos del conceyu d'Ayer tuvieron una selmana ensin serviciu ferroviariu, repúnxose'l pasáu sábadu y 24 hores dempués volvióse a suspender, col consiguiente treslláu n'autobuses", esplicó.
El diputáu popular, en nota de prensa, afirmó qu'esta "inseguridá" na prestación del serviciu perxudica l'usu del tren, "con cortes de llinies y suspensión de servicios en distintos llugares a lo llargo del branu".
Rafael Alonso recordó que'l Gobiernu del Partíu Popular tenía programáu un plan de cercaníes, que beneficiaba especialmente a Asturies, con un montante económicu d'unos 680 millones, "y col compromisu de nun suprimir nenguna llinia".
El parllamentariu popular señaló qu'agora hai series duldes de que los socialistes cumplan los compromisos del PP, y añedió que la llínea Collanzo-Moreda puede correr seriu peligru.
Coles mesmes, pidió a los socialistes asturianos qu'esixan al Gobiernu de Pedro Sánchez que cumpla col plan de cercaníes, "pa caltener los servicios con unes garantíes mínimes".
