El PP diz que l'informe de la Sindicatura demuestra que nel Idepa "faise lo que-y dea la gana a Marroquín"

Los 'populares' piden la dimisión del directivu, al qu'acusen d'insultar a la Sindicatura

UVIÉU, 5 de Febreru (EUROPA PRESS)

El diputáu del grupu parlamentariu del PP, José Agustín Cuervas-Mons, volvió criticar güei la xestión del presidente del Institutu de Desarrollu Económicu del Principáu d'Asturies (Idepa), Víctor González Marroquín y aseguró que l'informe definitvu de fiscalización del Idepa emitíu pol Sindicatu de Cuentes demuestra lo que los 'populares' lleven tiempu denunciando, ye dicir, que nel organismu "faise lo que-y dea la gana al home que más gana n'Asturies, que nun ye otru que Marroquín".

En rueda prensa Cuervas-Mons afirmó que los informes de la Sindicatura "falen por sí solos" y entrugóse qué más fai falta pa que'l Gobiernu d'Asturies faiga algo al respeuto y alguién asuma la so responsabilidá.

"Ante estos informes la única solución ye la dimisión o'l cese del señor Marroquín, qu'amás dedícase a insultar a la Sindicatura encargando pa ello un informe pol que pagó 12.000 euros de tolos asturianos", dixo'l 'popular', qu'insistió en qu'una persona que "cobra 107.000 euros añales nun pue dedicase a insultar".

El diputáu del PP, qu'indicó qu'a so grupu parlamentariu los informes de la Sindicatura nun-yos llegó de manera oficial, entrugóse "cuándo va acabase'l matonismu d'algunos de los presidentes d'entidaes públiques", y destacó que cuando la Sindicatura emite informes desfavorables estos "matones" dedíquense únicamente a insultar.

Esplicó que l'informe de la Sindicatura dexa claro que nel casu de les sovenciones concedíes pol Idepa, los criterios de concesión nun son nin claros ni oxetivos y el 54% de les mesmes otórguense por "procedimientu dixital", ye dicir, a deu. Añadió que "muncho más grave ye lo qu'asocede coles contrataciones, nes que la tramitación urxente nun se xustifica y los criterios son suxetivos, según diz la Sindicatura".

Nesti sen, Cuervas-Mons manifestó que l'informe espeya "cuestiones tan graves" como la existencia de factures pagaes a una empresa hasta enantes de que se convocare'l concursu. "Qué dalguién esplique si eso ye o nun ye delitu", dixo'l diputáu del PP, qu'insistió en que'l Principáu debe tomar cartes nel asuntu.

INFORME DE CARRETERES.

El diputáu del PP refirióse tamién al informe de la Sindicatura sobre la xestión de la Direición de Carreteres y dixo tar sorprendíu pola satisfaición mostrada pol conseyeru d'Infraestructures, Mediu Ambiente y Ordenación del Territoriu, Francisco González Buendía.

"Yo la verdá ye que cuando lleí les declaraciones de Buendía nun entendía nada, porque o bien nun ye lleyó l'informe, o nun s'entera de lo que llee, o quier corre-yos la galga a los asturianos", acabó Cuervas-Mons.