UVIÉU, 25 de Mayu (EUROPA PRESS)
La candidatura del PP n'Uviéu, liderada pol que foi l'alcalde esta llexislatura, Agustín Iglesias Caunedo, impúnxose n'Uviéu. Tamién ganó en Xixón la que foi l'alcaldesa estos años, la candidata de Foru, Carmen Moriyón. Sicasí, los dos dirixentes van tener que facer frente a unes corporaciones bien fragmentaes que podríen hasta ponese d'acuerdu con otres fuerces polítiques y poneles en serios apuros.
La irrupción de nueves formaciones polítiques, como les candidatures auspiciadas por Podemos, o Ciudadanos en menor midida, abrió un escenariu nel que los pactos y les negociaciones puen tener un papel fundamental.
N'Uviéu, Caunedo llogró 11 de los 27 conceyales nun conceyu onde se precisen 14 pa gobernar con mayoría absoluta. Como segunda fuerza na ciudá entró Somos, la candidatura promovida por Podemos liderada por Ana Taboada, que cuenta con seis conceyales, unu más que'l PSOE de Wenceslao López. Trés ediles caltén IU n'Uviéu, mientres que Ciudadanos llega al Conceyu con dos. D'esta manera, les combinaciones que puen establecese son delles n'Uviéu. Un supuestu bloque de la suma de Somos, PSOE ya IU, tendría 14 conceyales, abondos p'articular una mayoría absoluta y poner fin a los años de mandatu del PP.
Significativa foi l'esbarrumbe de Foru n'Uviéu, que quedó sin representación al respective de les últimes elecciones, cuando tuvo siete ediles. Los sos apoyos volatilizáronse tres un periodu marcáu por baxes y desencuentros.
XIXÓN
Sicasí, la suerte de Foru foi distinta en Xixón, onde la candidata, Carmen Moriyón llogró imponese con ocho ediles, unu menos que va cuatro años. El PSOE, lideráu por José María Pérez, llogró siete, trés menos que nel 2011. Ello ye qu'esta ye la primer vez na que'l PSOE pierde unes elecciones llocales en Xixón.
Sicasí, la entrada d'una candidatura como Xixón Sí Puede, vinculada a Podemos y liderada por Mario Súárez del Fueyo, pue resultar importante. De fechu entró como tercer fuerza política na corporación, con seis diputaos. Igual que n'Uviéu, si socialistes, Podemos ya IU xunten efectivos podríen articular un bloque con mayoría absoluta y pone-y les coses bien difíciles a Moriyón nun Conceyu nel que'l PP tuvo un reultáu bien probe: namás trés ediles frente a los cinco del 2011.
De los trés principales ciudaes asturianes tocantes a población, el PSOE sí s'impunxo n'Avilés cola candidatura de Mariví Monteserín, que tuvo ocho ediles y que nun paez que vaya a tener problemes pa ser la nueva alcaldesa, sustituyendo a la tamién socialista Pilar Varela.
Tamién nesta ciudá entró con fuerza Somos, la candidatura vinculada a Podemos, con cinco ediles. Ganemos, otra formación que foi escisión de l'anterior, tamién llogró un conceyal. El PP ye la segunda fuerza n'Avilés, con seis conceyales, mientres qu'IU llogra trés y Ciudadanos entra con dos. N'Avilés, Foru tampoco llogró representación.
CUIDEIRU
El panorama políticu en Cuideiru, el conceyu asturianu que tuvo una vida política más convulsa esta llexislatura y que llega rexíu por una xestora, tamién yera oxetu d'espectación. Los resultaos nun paecen escamplar les rocees.
Ello ye que PSOE y PP empataron, con cinco conceyales caún. Foru, Somos y Vecinos por Cudillero repártense los trés ediles restantes, a razón d'ún caún.
CONCEYALES
Col 99,61 per cientu escrutáu y una astención del 37,79 por cientu n'Asturies, los conceyales a escoyer yeren 942. El PSOE llogró 399 nos distintos conceyos, mientrese que'l PP llogró 209, IU 129 y Foru 83.
De los 78 conceyos asturianos, hai 32 nos que'l PSOE llogró la mayoría absoluta, seis el PP, cuatro Foru, tres IU, por unu de Promusa y otru d'AIS.
Los socialistes llograron amás mayoríes relatives en 18 conceyos, ente que'l PP fizo lo propio en cinco, IU en trés, Foru en dos, IPÑ n'unu y NOS-Ibias n'otru.
La mayoría de los votos nes municipales asturianes fueron pal PSOE, col 27,53% de los sufraxos, mientres que'l PP llogró'l 20,73%, IU el 13,30% y Foru un 12,11%.
