El PP ofrece al candidatu la mesma llealtá que Rubacalba con Rajoy

UVIÉU, 23 de Mayu (EUROPA PRESS)

La vocera del PP na Xunta Xeneral d'Asturies (XXPA), Mercedes Fernández, dixo esti miércoles que ta dispuesta a otorgar al futuru Gobiernu de Javier Fernández (PSOE) la mesma llealtá que'l líder de los socialistes a nivel nacional, Alfredo Pérez Rubalcaba, ofreció al presidente del Gobiernu, Mariano Rajoy.

"Vamos collaborar nos temes que son d'interés xeneral", señaló Mercedes Fernández, que dixo que'l candidatu va poder contar col PP pa temes como'l de la minería del carbón o les tarifes eléctriques pa grandes empreses, un problema que podría acarretar alguna desllocalización n'Asturies. "Vamos collaborar actívamente", insistió Mercedes Fernández.

Asina lo dixo Mercedes Fernández na sesión d'elección de presidente nel parlamentu asturianu, onde protagonizó ún cara a cara col candidatu socialista. Mercedes Fernández animó al candidatu del PSOE a que s'atreva a construyir un "futuru distintu" porque les rectes del pasáu "nun valen".

Sicasí, la vocera del PP foi na so intervención na Cámara dura al respecto de les intervenciones de Fernández y sobremanera, sobre'l so discursu d'investidura que, según el PP, limitóse a "enunciar preguntes". Según Mercedes Fernández, les families asturianes nun precisen más preguntes porque "bastantes fáense pa llegar a fin de mes" y lo que soliciten son "garantíes".

Dende'l PP reprocharon a Javier Fernández qu'omitiera nel so discursu les causes de l'actual situación de crisis, qu'atribuyó a los distintos gobiernu socialistes. "Les causes fueron un déficit desafranáu, una deuda descomanada, un gastu disllocáu y la negativa de la realidá", señaló.

En recordando al candidatu socialista'l 'Casu Marea', la presunta trama de corrupción na contratación na que se vio implicáu un conseyeru socialista, Mercedes Fernández reprochó al candidatu socialista que'l PSOE nun collaboró precisamente a meyorar la rexeneración democrática. "Usté tuvo en munchos gobiernos socialistes que dexaron descreitu, paru, espilfarru y, algunos, corrupción", díxo-y a Javier Fernández.

Reprochó-y al futuru presidente rexonal que nun falara nel so discursu inicial sobre los mozos, o que nun concretara los recortes que tien previsto llevar a cabu.

MINERÍA

Pero bona parte del discursu de Mercedes Fernández y de les sos crítiques al PSOE centráronse nel sector mineru. Pidió al candidatu que diga algo que "calme" a los mineros asturianos.

Dixo que la falta de concreción de Javier Fernández nesti asuntu tien que ver coles dos posiciones tán estremaes que tienen nesti asuntu los sos dos apoyos na investidura: IU, que ye favorable a les esplotaciones, y UpyD, que nun ye partidariu del carbón. Mercedes Fernández señaló que la líder de la formación maxenta, Rosa Díez, presentó iniciatives nel Congresu pa "zarrar les mines y dedicales al turismu".

Mercedes Fernández cargó contra'l PSOE por preocupase "agora" col PSOE, dempués d'años de "complicidá, silenciu y inacción". La situación actual de la minería atribuyóla Mercedes Fernández a la mala xestión del anterior presidente del Gobiernu, José Luis Rodríguez Zapatero "que nun presentó un plan pa defendelo ante la Unión Europea". Tamién culpó al comisariu européu de la Competencia, Joaquín Almunia. "¿Qué pasó colos fondos mineros, cuando gobernaben ustedes?", preguntó-y a los socialistes. Pa criticar la posición de los socialistes, Mercedes Fernández exhibió na Cámara semeyes de los socialistes na fiesta minera de Rodiezmo, xunto con Zapatero.

CASCOS

La vocera del PP nun quiso dexar pasar les crítiques incluyíes nel discursu inicial que realizó Javier Fernández a la derecha asturiana pol conflictu calteníu, que llevó a Asturies a la convocatoria d'otres elecciones autonómiques.

"Nun-y deseo a usté qu'Alfonso Guerra cree un partíu políticu distintu al PSOE, porque se pasa bien mal", dixo Mercedes Fernández al candidatu, en clara alusión a lo que pasó con Francisco Álvarez-Cascos, que marchó del PP y creó el partíu de Foru Asturies. "Nun faiga reproches de coses qu'algunos sufrimos, pero nun protagonizamos", díxo-y a Javier Fernández.

La vocera del PP tamién tuvo tiempu pa realizar alguna reivindicación en cuanto al funcionamientu internu del parlamentu asturianu. Asina, esixó que dende la oposición puean realizar al presidente'l "necesariu" llabor de control al Gobiernu con preguntes periódiques selmanales al presidente.

Tamién se quexó pol procedimientu fixáu na normativa asturiana pa la elección del presidente, que nun permite a los grupos parlamentarios votar en contra. Namás se vota a favor o s'astién.

A lo último, Mercedes Fernández quiso agradecer la defensa del "interés xeneral" a lo llargo d'estos meses del actual conseyeru de Cultura en funciones, Emilio Marcos Vallaure, qu'ostentó esi cargu mientres el mandatu de Francisco Álvarez-Cascos.