El PP pide a la Fiscalía Anticorrupción qu'investigue l'Axencia de Proyeutos Culturales d'Asturies

MADRID, 20 de Payares (EUROPA PRESS)

El PP asturianu formalizó güei ante la Fiscalía Anticorrución una denuncia escontra l'Axencia de Proyeutos Culturales del Principáu d'Asturies y tola so estructura, al entender qu'existen nicios de delitu na xestión d'ésta, col oxetivu de que se depuren responsabilidaes dientro del Gobiernu de Vicente Álvarez Areces.

En declaraciones a los medios na sede de la Fiscalía Anticorrupción, el diputáu nacional del PP, Jaime Reinares, y el parlamentariu rexonal, Ramón García Cañal, señalaron qu'esta denuncia ye'l resultáu d'una investigación que duró "dellos meses" qu'aconceya información parlamentaria y d'otros ámbitos.

Reinares destacó'l detalláu trabayu d'investigación del diputáu rexonal y señaló que d'esta deriva que'l Gobiernu d'Asturies cometió dellos "supuetos delitos" rellacionaos cola corrupción y la prevaricación. "Tamos obligaos como principal partíu de la oposición a poner esto en conocencia de l'autoridá competente", sorrayó.

El diputáu rexonal del PP, pela so parte, indicó que'l pasu de presentar una denuncia ante la Fiscalía Anticorrupción se decidió dempués de que'l PSOE y IX torgaren la constitución d'una comisón d'investigación na Xunta Xeneral del Principáu que "esclariare" la xestión de les 65 empreses y entes públicos qu'arrodien l'Axencia de Proyeutos Culturales.

Señaló que yera "obligación" del PP "tirar de la manta" teniendo en cuenta qu'esta estructura manexó cerca de 100 millones d'euros pa proyeutos de la talla de la Universidá Llaboral. "Sospechamos qu'hai nicios de corrupción non sólo na Axencia de Proyeutos Culturales sinón n'empreses y sociedaes que deriven d'ésta", señaló.

Amás, al so xuiciu, "nun se pue pesllar el tema frayando la cuerda pel puntu más débil, que ye'l funcionariu, porque les responsabilidaes llegen hasta'l propiu Álvarez Areces". "Tien qu'haber tresparencia, tien qu'haber investigación y tien que llegase a lo último de la situación pa determinar l'algame d'estes posibles corrupciones", dixo.

"Les diferentes sociedes públiques qu'hai nel Principáu lleven centenaries de milllones d'euros de presupuestu", alvirtió García Cañal, que cargó contra la "escuridá" de munchos "chiringuitos socialistes" nos que se "espilfarra sistemáticamente" y que nun se somenten a los controles llegales de l'Alministración pública.