El PP pide al Gobiernu rexonal un plan estratéxicu pa que'l Principáu recupere población

UVIÉU, 30 de Payares (EUROPA PRESS)

El Grupu Popular na Xunta Xeneral del Principáu d'Asturies (TSXA) rexistró na Cámara una proposición non de llei pal so alderique nel Plenu pola qu'encamienta al Conseyu de Gobiernu qu'ellabore y presente, a lo llargo del primer semestre del 2010, un plan estratéxicu de recuperación demográfica nel Principáu d'Asturies.

La iniciativa presentóla güei nuna rueda prensa'l presidente del PP d'Asturies y voceru del grupu, Ovidio Sánchez, acompañáu del voceru axuntu, Joaquín Aréstegui, y pola diputada del PP, Inmaculada González.

Según Sánchez, esta cuestión ye tovía más importante que la discusión sobre'l presupuestu rexonal, poles repercusiones que pue tener pa la rexón. Esplicó que demientres los diez años que'l socialista Vicente Álvarez Areces lleva al frente del Gobiernu perdióse población y que, según la proyeición del Institutu Nacional d'Estadística (INE), los habitantes del Principáu descenderán nos próximos diez años en más de 50.000 habitantes pola cayida de la natalidá y la inmigración.

"Asturies ye la única rexón que perdió población nos últimos años", llamentó Ovidio Sánchez, que tachó de "fracasu" les polítiques d'Areces nesta materia. Asina, sorrayó la importancia d'un "debate serenu" nel Parlamentu asturianu sobre aiciones encaminaes a invertir esa tendencia pa remocicar la población y p'alteriar la composición de l'actual pirámide de la población.

De fechu, Sánchez criticó al actual Gobiernu autonómicu por retirar les ayudes a la natalidá, que veníen siendo de 500 euros. Ante l'actual panorama, dixo, cualquier elementu "desincentivador" ye una mala noticia. Recordó que los países europeos que más algamaron crecer en población son los que más ayudes tienen.

"POLÍTICA SUICIDA"

Pela so parte, Joaquín Aréstegui, calificó de "suicida" la política demográfica del Gobiernu d'Areces y señaló que ye la comunidá autónoma que menos ayudes da a les families. Esplicó que si la so prosoción de llei nun sal alantre, el PP presentará'l so propiu plan.

Entrugáu polos conteníos del mesmu, nesti supuestu, Aréstegui faló d'ayudes a la natalidá, educación de baldre, evitar la emigración, favorecer la inmigración, fomentu del emplegu y un 'plan de torna' pa los asturianos que tán trabayando fuera de la rexón. "Nun podemos permitir que siga esta desidia gubernamental", insistió.