UVIÉU, 30 de Xineru (EUROPA PRESS)
El Partíu Popular va proponer el cambiu del Réxime de Permanencia de la Universidá d'Uviéu pa suprimir dos condiciones que considera "inapropiaes": una sería la esixencia de tener aprobaos 48 creitos de primer cursu al acabar el terceru, y la otra sería la de que se cuente la convocatoria d'exame anque l'alumnu nun se presente.
La diputada del PP na Xunta Xeneral, Susana López Ares, ofreció esti vienres una rueda prensa pa esplicar la postura del so partíu con esta situación. Na so opinión, la esixencia d'estos 48 creitos nun ye xusta porque provoca que s'espulse "a alumnos que tienen un progresu afayaízo".
El reglamentu actual esixe aprobar un mínimu de 12 creitos (dos asignatures por cursu) y un mínimu de 90 al acabar tercer cursu, pero d'esos 90, 48 obligatoriamente han ser de primeru. "Colo que podemos alcontramos con alumnos qu'al acabar terceru tienen aprobaos 120 o 130, pero como 48 d'ellos nun son de primero tienen qu'abandonar los sos estudios", criticó Ares.
Asina, cifró en 51 los alumnos que se vieron nesta situación al acabar l'añu lectivu 2013-2014, una situación que, alertó, va repitise a lo último del presente cursu si nun se modifica'l reglamentu. Amás, otros 1.013 alumnos nun aprobaren los 12 esixíos por cursu, 60 nun superaren nin los 48 de primeru nin los 90 totales al acabar terceru y 103 aprobaren los 48 de primeru al acabar terceru, pero non los 90.
Según los datos d'Ares, en total la Universidá recibió 411 reclamaciones por toos estos casos de les que s'aceptaron un total de 183. "Cuando una llexislación suma un númberu tan altu de reclamaciones, y tamién de reclamaciones aceptaes, ye que se trata d'una normativa non afayaíza", considera la parlamentaria autonómica, que tamién formó parte del equipu rectoral de la Universidá d'Uviéu.
Tamién mostró la so postura crítica cola norma que dexa que cuerra convocatoria d'exame anque los alumnos nun se presenten, puesto que tienen un máximu de seis p'aprobar la materia. Ello ye que comentó que si un alumnu tien pendiente una de primeru y en segundu decide nun presentase, van correr dos convocatories y poro yá va tener cuatro gastaes. Esta situación "desincentiva a superar les asignatures de primeru".
Ares acusó a la directora xeneral d'Universidaes del Gobiernu asturianu, Miriam Cueto, de "falta de voluntá política" pa modificar estos dos apartaos, y preguntóse si los representantes del Executivu autonómicu nel Conseyu Sociassl de la Universidá, de los depende esta cuestión, tean dispuestos a modificala.
