UVIÉU, 16 d'Avientu (EUROPA PRESS)
El PP d'Asturies preguntó esti martes al Gobiernu socialista asturianu "ónde fueron a parar" 3.500 millones d'euros de fondos mineros que tenía presupuestaos el Ministeriu d'Economía y que, a lo último, "nun fueron tresferíos al Institutu del Carbón". Esta partida, según esplicó la diputada Emma Ramos, correspuéndese con convenios dende'l 2006 al 2011. "De primeres, estos fondos esviáronse", destacó la popular.
Emma Ramos fizo estes declaraciones en respuesta a la reclamación xudicial del Principáu, na que piden que se pague colos Presupuestos Xenerales del Estáu "non solo obres de 2006-2009, si non obres del primer planu, de 1998 a 2005". "Vuelve surdinos una duda, por qué'l señor Torre (en referencia a Graciano Torre, conseyeru d'Industria), nun entendió que-yos competía facer les reclamaciones nesi momentu y ye agora cuando-y surde la necesidá de requerir la recepción de los fondos", añadió.
Asina, la popular considera "inaudito" que'l Conseyeru d'Industria y el so homólogu en Presidencia, Guillermo Martínez, "dean ruedes de prensa p'atacar al Gobiernu central cuando, en realidá, el Principáu d'Asturies nun foi a roblar convenios nel so momentu, hubo convenios sin executar totalmente y sin renovase en plazu". "Nun pagaron obres que taben certificaes y, en dellos casos, nun remataron obres nel plazu fixáu y n'otros nin siquier llegaron a empezase", señaló.
Emma Ramos punxo como exemplu'l casu de Talleres del Conde, en Llangréu. El Conceyu, señaló la diputada, "pretendía cobrar 1,2 millones d'euros que pagara pola obra de los talleres. Sicasí, el Principáu procedió a la revocación de la sovención na midida que consideraba que se produxera un incumplimientu de los plazos". "Hai un incumplimientu de los plazos pal Conceyu de Llangréu y, sicasí, el Partíu Socialista esixe al Gobiernu central que nun-y reclame sovenciones por esi mesmu motivu", añadió.
