UVIÉU, 31 de Xunetu (EUROPA PRESS)
Los grupos parlamentarios del PP y PSOE sacaron alantre nel Plenu la designación del actual director de Liberbank, Manuel Menéndez Menéndez, como patronu de la Xunta Xeneral na Fundación Bancaria Caxa d'Aforros d'Asturies. Foru y UPyD votaron en contra del nomamientu mientres IU astúvose.
Tres la votación, que se saldó con 24 votos a favor, 12 en contra y cuatro astenciones, el diputáu d'UPyD, Ignacio Prendes, esplicó'l so votu en contra. Esti nomamientu, dixo, ye un "actu deriváu de la Llei de Caxes Bancaries del Gobiernu Central", que nun comparte. "La llei nun corrixe los grandes problemes del sistema bancariu y nun avanza de forma clara na despolitización de les caxes", esplicó. Por ello, calcó na "existencia de criterios oxetivos y llegales" que torguen emprestar l'apoyu al nomamientu de Menéndez "independientemente de la so capacidá" pal puestu.
El voceru d'IU na Xunta, Aurelio Martín, tamién centró la defensa de l'astención del so grupu na Llei de Caxes, de la que dixo que supón el "desapoderamientu público definitivo" de la entidá asturiana. Con esta llei, criticó, les caxes "escaecen el so calter social" en virtú de la rentabilidá "a cualquier preciu".
Pela so parte la vocera del grupu de Foru Asturies, Cristina Coto, calcó en qu'esta votación foi un "gravísimu error" del que nun quisieron participar. "Foru nun da la so confianza a esti directivu", dixo Coto, porque resulta "imposible" separar el nomamientu del fechu de que Menéndez "ye responsable" de la "desastrosa xestión" de Caxastur, dende que "perdió'l norte y aventuróse na aventura megalómana de Caja Castilla La Mancha".
En respuesta a les crítiques del restu de grupos parlamentarios, el diputáu del PP Matías Rodríguez Feito calcó "na honorabilidá y disposición d'exercer un bon gobiernu na Caxa" per parte del yá patronu de la entidá. Según el parlamentariu popular', el PP "nun tuvo inconveniente en designar al candidatu sin oscurantismos y anteponiendo los intereses d'asturianos, que sienten como parte d'ellos la Hestoria de la Caxa". Asina fizo referencia a les acusaciones feches por Foru sobre un supuestu "pactu tapecíu" ente PP y PSOE p'algamar acuerdos "fuera del Parlamentu asturianu".
Asina, calcó en qu'agora "nun ye momentu de xenerar más tracamundiu na transición de caxa a fundación", y acusó a los grupos opuestos al nomamientu de ser "poco respetuosos col restu de grupos". "Hailos qu'antes aplaudíen coles oreyes por esti candidatu y güei opónense dende otru grupu políticu", criticó.
A lo último'l voceru del grupu parlamentariu socialista, Fernando Lastra, reprochó a Foru que trate de "enllenar de basoria" el Parlamentu y reprochó-y el so posición de "faltar a tol mundu" mientres la votación. L'alderique, dixo, ye "más cenciellu". "Güei votamos esto porque lo ampara la llei, tenemos la obligación de facelo porque si non, nun va acabar el procesu de tornar la caxa en fundación", defendió.
Sobre'l supuestu "pactu" ente PP y PSOE repitíu por Foru, Lastra sorrayó que les sos declaraciones respuenden a que-yos fadia "la normalidá política", polo que "intenten crear acuerdos ocultos diciendo que s'aprobaron lleis con acuerdos políticos fuera de la Cámara". Lo cierto, dixo, ye que los grupos participen y avergóñense de lo único que saben facer, que ye "algamar pactos políticos".
En respuesta a Martín (IU), el socialista Lastra calcó en que nun se pue privatizar "daqué que yá ye privao", de la que-yos reprochó que s'echen "fuera" y desvincúlense de la Caxa porque tamién ellos "son responsables" de la decisión de tornar la Caxa en Fundación.
ESPULSAOS DEL PLENU TRABAYADORES DE CAXASTUR
Tres la votación, un grupu de trabayadores de Caxastur qu'acudiera como públicu al nomamientu de Menéndez acabaron espulsaos de la Cámara por atayar la intervención de Fernando Lastra. Baxo berros como "la privatización ye robu y corrupción", los trabayadores censuraron el nomamientu.
A les puertes del Parlamentu asturianu tamién s'alcontraben dellos trabayadores de la Caxa, que se manifestaron en contra de la privatización de la entidá. El procesu de privatización de la Caxa supón, al so xuiciu "una estafa ensin precedentes a la sociedá asturiana".
