XIXÓN, 30 d'Ochobre (EUROPA PRESS)
El diputáu rexonal del Partíu Popular José Agustín Cuervas-Mons esixó esti xueves al presidente rexonal, Javier Fernández, que dea esplicaciones sobre qué midíes va adoptar tres el pidimientu per parte de la UE de la devolución de les ayudes de l'ampliación d'El Musel por supuestes irregularidaes, a lo que recordó que la xestión d'esti proyectu foi en tou momentu responsabilidá "absoluta y directa" del PSOE, que naquelles feches gobernaba nes trés alministraciones (llocal, rexonal y estatal).
"Nun-y sentía nin una palabra", indicó sobre Fernández en rueda prensa na sede del PP de Xixón, acompañáu del presidente popular' llocal, hores antes de la interpelación na Xunta Xeneral del Principáu a la conseyera de Fomentu, Belén Fernández, sobre esti asuntu.
Ello ye qu'apuntó que con ello entama'l PP la so investigación, anque ante'l pidimientu de Foru d'abrir una Comisión d'Investigación sobre esti asuntu, llendóse a señalar que nun lleera la propuesta pero que'l so partíu nun se caracteriza por torgar nenguna investigación. Y sobre posibles responsabilidaes xurídiques, apostó por dexar actuar a l'Abogacía del Estáu.
Coles mesmes, achacó al presidente rexonal el tener "doble personalidá", dao qu'él yera secretariu xeneral de la FSA-PSOE mientres la xestión de l'ampliación portuaria y en tolos casos de "grandonismu" del so antecesor na Presidencia del Principáu, Vicente Álvarez Areces, pero, sicasí, aparenta que "llegó ayeri" ante noticies como les del Puertu. El diputáu, nesti sen, quiso qu'esplique hasta si va depurar posibles responsabilidaes nesti casu.
Cuervas-Mons, amás, calcó en que naide desea qu'haya que devolver les ayudes y manifestó tener "seguridá absoluta" de que'l Gobiernu de la Nación va facer "tolo que tea na so mano" pa evitalo. Pensar lo contrario, pa él, sería "una desfachatez". De la mesma, alertó que si la devolución faise efectiva, el Puertu de Xixón pue quedar "tocáu y llastráu" económicamente por munchu tiempu.
