Prendes (UPyD) pide a Fernández más apoyu a entamadores y abandonar la "cultura" de la sovención

UVIÉU, 23 de Mayu (EUROPA PRESS)

El diputáu d'UPyD na Xunta Xeneral d'Asturies (XXPA), Ignacio Prendes, demandó esti miércoles al candidatu del PSOE a la Presidencia del Principáu, Javier Fernández, un ampliu compromisu con los entamadores, asina como que ponga fin a la "enraigonada cultura de la sovención y el subsidiu" n'Asturies.

Na so intervención na sesión plenaria d'elección del presidente, Prendes dixo qu'esa cultura de la sovención foi "anestesiando" a la rexón y "atrabancó" la iniciativa privada, fomentando una Asturies "especializada na busca de les ayudes y rentes públiques".

D'esta manera, el diputáu d'UPyD dixo qu'echó en falta nel discursu inicial de Fernández una mayor atención a los entamadores, que son los que "tán dispuestos a asumir riesgos" y que n'Asturies tienen de ser un "bien absolutamente protexíu" por escasu.

Prendes, que va apoyar na investidura a Fernández pero nun va entrar nel futuru executivu, cree que'l futuru gobiernu asturianu tien que facer de la rexón una sociedá atractiva pa la inversión y l'actividá económica, "independiente del subsidiu y la intervención pública". El diputáu d'UPyD dexó claro que l'apoyu que-y da a Fernández depende del cumplimientu de los sos acuerdos. "Nun pueo da-y la mio confianza; emprésto-yla", dixo.

INFRAESTRUCTURES

Nel so discursu, Prendes pidió a Fernández qu'encabece un "Gobiernu reformista" que tienda la mano a tol arcu parlamentariu y que busque "consensos". Nesti sen, punxo como exemplu la necesidá d'un "gran pactu" sobre les infraestructures asturianes pendientes.

L'oxetivu d'UPyD ye que'l llogru d'eses infraestructures nun se vea como'l llogru del gobernante de turnu, sinón como frutu del esfuerzu de tola sociedá asturiana. D'esta manera, plantega la necesidá d'esi pactu que supere "divisiones y enfrentamientos estériles" que-yos dexe falar con una "única voz", tanto nes relaciones col Gobiernu central como cola Unión Europea.

CONCERTACIÓN

Eso sí, Prendes alvirtió de les sos diferencies con Fernández tocantes a la intención del socialista de potenciar la concertación social colos axentes sociales. UPyD recordó al futuru presidente qu'Asturies yá cometió con anterioridá "l'error" de tornar la concertación social en "una tercer cámara de negociación presupuestaria".

Y Prendes recordó que criticó a anteriores gobiernos pola so pretensión de "sustituyir" l'acuerdu políticu na Xunta Xeneral d'Asturies polos acuerdos "colos axentes sociales". Prendes considera que cualquier acuerdu ye conveniente y necesariu, pero entiende que "nun tien qu'usase esi instrumentu pa evitar y suplantar a la institución democrática que mos representa".

CASU MAREA

Nel so discursu, Prendes estimó que Javier Fernández mentara espresamente cuestiones básiques nel acuerdu ente dambes formaciones polítiques, como l'estudiu de la reforma electoral, l'analís d'una reforma municipal, "superando llocalismos", y l'impulsu d'una comisión d'investigación sobre'l 'Casu Marea', la presunta trama de corrupción na contratación pública qu'afectó al anterior gobiernu socialista.

Nesti puntu, Prendes dexó claro que "la responsabilidá política tien el so ámbitu específicu d'esixencia y ésti tien que ser la institución que mos representa a toos, el parlamentu, asina asocede en tolos países de mayor calidá democrática".

CRÍTIQUES A CASCOS

La intervención inicial de Prendes nun tuvo exenta de dures crítiques a la xestión del actual Gobiernu d'Asturies en funciones lideráu por Francisco Álvarez-Cascos. Según Prendes, estos meses de caracterizaron por una completa "inacción" y una sensación de "caos", qu'acabó na so "incapacidá pa ellaborar unos presupuestos realistes y de consensu".

Prendes dixo que'l "desgobiernu" de Cascos supunxo un retrasu na toma de decisiones, agravando la difícil situación d'Asturies. Por eso, consideró que l'actual situación tien que ser "endrechada" con urxencia, "per mediu d'una xestión seria, rigorosa y responsable".