UVIÉU, 03 de Febreru (EUROPA PRESS)
El presidente del Candás Club de Fútbol, Iván Sampredo, enfréntase a una posible acusación de simulación de delitu, en reconociendo ante la Guardia Civil que simuló'l robu del dineru de la llotería a manes de dos supuestos atracadores, tal como denunciara va trés selmanes.
Sampedro presentó esti vienres en rueda prensa la so dimisión del cargu, en realizando delles "comprobaciones" y "matizaciones" esti xueves, mientres una declaración nos llocales de la Guardia Civil.
Fontes de la investigación confirmaron a Europa Press que'l responsable de la entidá deportiva reconoció en dicha declaración que simulara l'atracu. Según la so versión, dos encapuchaos asaltáronlu nel entornu del Campu La Mata y arrampuñáron-y pola fuerza unos 5.000 euros, correspondientes al premiu que-y tocara al númberu del club nel sortéu d'El Neñu. El presidente disponíase naquel momentu a pagar, nos llocales del club, a los que mercaren papeletes, premiaes caúna con 24 euros.
En presentando esta falsa denuncia, la cúpula de la so directiva presentó la dimisión. Sicasí, Sampedro convocó una asamblea de socios el pasáu vienres, na que ratificó la so versión y mostró la denuncia presentada ante la Guardia Civil. Aseguró que la llotería pagaríase y que los xugadores namás llevaben un mes de retrasu nos cobros.
En rueda prensa, este mesmu vienres, el presidente namás informó de la so dimisión y de la retirada de la so denuncia. El Candás Club de Fútbol queda agora sin directiva. Nestos momentos, ocupa la sesta plaza y caltién series opciones de xugar la fase d'ascensu a segunda B, dempués de ganar fuera casa al Unión Popular de Llangréu na pasada xornada. Esti domingu xuega contra'l Luarca.