MAIDIGURI (NIXERIA), 19 d'Avientu (Reuters/EP)
L'ataque lleváu a cabu'l domingu por presuntos milicianos de la secta islamista Boko Haram en Gumskiri, una llonxana localidá del nordés del país, saldaríase col secuestru de 172 muyeres y neños y l'asesinatu d'otres 35 persones, según dellos residentes.
Abu Musa, ún de los residentes, dixo que la cifra correspuende al recuentu lleváu a cabu na población dempués del ataque. "La mio hermana y los sos siete fíos tán ente los secuestraos. Nós corrimos a escondenos y tuvimos suerte, pero a otros nun-yos foi tan bien", afirmó.
"Axuntaron a la xente, mataron a más de 30 persones y llevaron a más de 100 muyeres y neños en dos camiones descubiertos", relató Maina Chibok, que nun foi testigu del ataque pero que ye de Gumskiri y visitó a la so familia poco dempués de los fechos.
Anque nengún grupu reivindicó entá l'autoría, l'ataque lleva tolos signos de Boko Haram, que nun ataque asemeyáu'l pasáu mes d'abril secuestró a más de 200 neñes nuna escuela secundaria en Chibok, mui cerca del llugar d'esti últimu ataque na frontera con Camerún.
"Tamién quemaron un centru médicu gubernamental, cases y tiendes", esplicó Chibok. Una fonte de seguridá confirmó que se secuestró a más de cien persones y otres 35 morrieron nel ataque, incluyíu'l xefe de distritu.
