UVIÉU, 20 d'Abril (EUROPA PRESS)
Los miembros de l'asociación Softastur caltienen una postura de prudente optimismu ante la investigación abierta na Comisión Europea sobre les presuntes práctiques de posición dominante de Google, al imponer la instalación d'Android y les sos aplicaciones en fabricantes de dispositivos móviles.
Dos de los responsables del colectivu, Íñigo Varela y Mikel González, vieron con bonos güeyos la posibilidá de que puea terminase coles presuntes acciones monopolistes de Google. Sicasí, Varela recordó que'l códigu llibre d'Android ye precisamente lo que fizo posible que nel 2014 la páxina del colectivu desarrollara la versión en 'llingua' asturiana d'esti sistema operativu. La web de l'asociación esplica nesti momentu los pasos pa la so instalación.
Varela dexó claro que considera "negativos" tolos monopolios, y recordó que la situación actual d'Android colos móviles ye asemeyada a la de Windows (Microsoft), nel so día colos ordenadores. La diferencia, según l'informáticu y activista a favor del asturianu, ye qu'Android dispón d'un códigu llibre que permite la so traducción a otros idiomes, al marxe de les 20 llingües nes que lo presentó Google de primeres (ente elles el castellán).
Asina, recuerda que nun ye posible tener un Iphon (Apple) n'asturianu porque'l so sistema operativu ye restrictivu, y sí lo ye n'Android.
Sicasí, Mikel López recordó que la posición dominante que denunció la Comisión Europea de Google obliga a los fabricantes de móviles a instalar por defectu les sos aplicaciones propies, tales como Google Maps o Gmail, "en cuenta de dar la posibilidá al usuariu d'escoyer otres distintes".
Nesti momentu, existe la posibilidá d'instalar otres aplicaciones asemeyaes alternatives a les de Google, pero matiza González que "requier unos conocencies que nun tán al algame del usuariu mediu". "Al venir por defectu instaláu Google Maps, tol mundu utiliza Google Maps", añadió. Ye equí onde s'abre la posibilidá d'escoyer nueves aplicaciones, ente elles les que Softastur vaya traduciendo a la llingua asturiana.
