El Principáu alvierte a Mieres de los efeutos negativos d'un parque d'antenes de telefonía fuera'l cascu urbanu

MIERES, 19 de Payares (EUROPA PRESS)

La direición xeneral de Modernización, Telecomunicaciones y Sociedá de la Información del Gobiernu del Principáu d'Asturies, alvirtió al Ayuntamientu de Mieres de los efeutos negativos de la instalación d'un parque d'antenes de telefonía móvil fuera del cascu urbanu.

Ésa yera una de les propuestes incluyíes nel borrador d'ordenanza ellaboráu pola alministración llocal y que foi treslladáu sobre les consecuencies del alloñamientu de les estaciones radioeléctriques de les árees urbanes. Un estudiu que, según s'apunta dende'l Principáu, alerta de qu'esta posibilidá "implica que les estaciones tengan qu'emitir a una potencia mayor pa dar cobertoria" lo que supón que "va ser mayor la esposición a les emisiones que resulten de los terminales".

Amás, l'escritu del Principáu dexa claro que la ordenanza, por sí sola, nun ye l'instrumentu idoneu pa regular la ordenación urbanística de les redes de telecomunicación.

Con este informe enriba la mesa, la federación d'asociaciones de vecinos y la plataforma escontra antenes solicitaron güei que'l consistoriu se pongan en contautu cola Universidá de Valencia pa que realice otru informe sobre'l tema al tratase d'un organismu que "yá fizo estudios d'esti tipu", indicó'l secretariu de la federación, Ángel Luis Rubio. El representante vecinal exixó, amás, que l'equipu de Gobiernu "s'involucre más" con esti tema que "afeuta a la salú de los vecinos". Nesti sen, se manifestó tamién la responsable de la plataforma escontra les antenes, Noelia Rodríguez, qu'alertó de que los niveles d'emisiones en dellos puntos del cascu urbanu de Mieres son más altos de lo que recomienda la Unión Europea.