El Principáu celebra los 20 años de la Llei d'Usu del Asturianu con una charla sobre'l so futuru

Academia de la Llingua
EUROPA PRESS - Archivo
Publicado 13/03/2018 20:35:04CET

UVIÉU, 13 Mar. (EUROPA PRESS) -

En metá del debate sobre la oficialidá de la llingua asturiana, el Gobierno asturianu va celebrar los 20 años de la Llei d'Usu y Promoción del Asturianu con una mesa de xuristes que van analizar el desarrollu d'esta norma, que ye l'actual marcu llexislativu que tien la llingua asturiana, y les sos espectatives de futuru.

Nesti mes de marzu de 2018, cúmplense 20 años de l'aprobación de la Llei 1/1998 d'usu y promoción del bable/asturianu, que nel so momentu presentó'l Partíu Asturianista y qu'apoyó'l Gobiernu asturianu, dirixíu nesos momentos pol 'popular' Sergio Marqués.

Aprovechando esta fecha, la Conseyería d'Educación y Cultura va celebrar una mesa de debate con xuristes p'analizar el nivel de desarrollu de la Llei, el so usu como ferramienta de normalización y les espectatives de futuru del marcu llegal actual.

Na mesa, que va facese a les 19.00 hores del llunes 19 de marzu, nel Salón de Té del Teatru Campoamor (Uviéu), va participar el lletráu del Tribunal Constitucional, José Manuel Pérez Fernández; el Catedráticu de Derechu Alministrativu de la Universidá d'Uviéu, Leopoldo Tolivar Alas; y l'abogáu espertu en temes llingüístico-llegales, Nicolás Bartolomé Pérez.

Ellí, los xuristes van tratar temes como la Llei d'usu como ferramienta de normalización, el marcu llegal del asturianu en comparanza col d'otres llingües minorizaes, el nivel de desarrollu de la Llei y les sos espectatives de futuru.