El Principáu confía nel crecimientu de Capsa a pesar de nun salir la operación con Ebro Puleva

"Tengo dudes de que la compra de Puleva por Lactalis signifique la entrada de más lleche líquido n'España", diz Aurelio Martín

UVIÉU, 9 de Marzu (EUROPA PRESS)

El Conseyeru de Mediu Rural y Pesca, Aurelio Martín, recordó güei que Central Lechera Asturiana (CLAS) acabó'l pasáu añu como empresa líder del sector llecheru y siendo líder en lleche líquido, nata y mantequilla. Asina, y a pesar de que nun saliere la ufierta de Corporación Alimentaria Peñasanta (Capsa), que'l so máximu accionista ye CLAS, p'adquirir Ebro Puleva, Aurelio Martín dixo que nada fai pensar que CLAS nun siga calteniendo'l lideralgu.

Finalmente foi'l grupu Lactalis el que algamó mercar Ebro Puleva. El conseyeru asturianu nun pasó per alto que la operación xeneró "cierta preocupación" na empresa y nel sector, pero calcó en que nin la compra de Puleva por Capsa fuera la "panacéa", nin el fechu de que nun se llevó a cabu ye "un drama o un desastre". "El mercáu de lleche español sigue nun ciertu nivel d'atomización y insisto en que, tanto antes como dempués d'esta compra, CLAS ye la empresa con mayor cuota de mercáu en lleche líquido", señaló.

"Toi convencíu de les sos capacidaes y confío nel so crecimientu exóxenu pa caltener una posición importante nel mercáu", añadió'l Conseyeru.

Sobro la preocupación de los sindicatos agrarios asturianos sobre si esta operación operación traería la entrada de lleche francesa, el Conseyeru esplicó que, según los datos que tien el Ministeriu de Mediu Ambiente y Mediu Rural y Marín, el problema nun ta tanto na entrada de lleche líquido sinón na de productos ellaboraos, especialmente quesos, "que tán entrando con precios bien competitivos, bien baxos, inundar parte del mercáu español. Esti sí ye un elementu preocupante". "Tengo dudes de que la compra de Puleva por Lactalis signifique la entrada de más lleche líquido n'España", sentenció nesti sen.

Amás, Martín aseguró que CLAS va tener "tola complicidá de la Conseyería de Mediu Rural y Pesca pa siguir consolidando'l so crecimientu". Martín dixo que la empresa "aporta la metá del PIB agroalimentariu de la rexón, factura 852 millones d'euros y, poro, xuega un papel fundamental nel caltenimientu del nuesu sector agroganaderu", y sorrayó que la corporación, caltuvo, amás, "un compromisu, non yá de crecimientu, sinón de claru conteníu social siendo la empresa que más pagó'l llitru de lleche a los ganaderos".

A lo último, el Conseyeru anunció que nes próximes selmanes va treslladar al Ministeriu de Mediu Rural lo apropiao d'acelerar la puesta en marcha de dos midíes, anunciaes yá'l pasáu añu y que, al so xuiciu, van ser altamente beneficioses pal sector ganaderu de lleche español: la lletra Q, una midida de trazabilidá de la lleche pa que'l consumidor puea estremar la procedencia de la mesma y el desarrollu, en collaboración cola Comisión Europea, d'una campaña pa fomentar el consumu de lleche.