El Principáu diz que los datos del paru son malos anque asitien a Asturies como segunda comunidá onde menos medra

UVIÉU, 08 de Xineru (EUROPA PRESS)

El director xerente del Serviciu Públicu d'Emplegu del Principáu d'Asturies, José Luis Álvarez Alonso esplicó en rueda prensa que los datos del paru son malos y esperaos con un crecimientu en tolos sectores. Sin embargu, señaló que n'Asturies ye la segunda comunidá autónoma onde menos medró'l paru nel 2008 (24,18%) per detrás sólo de Galicia (22,53%).

Los 12.385 paraos más rexistraos n'Asturies demientres 2008 suponen un aumentu del 24,18 por cientu en comparanza col añu anterior, y eleva la cifra total de desemplegaos na comunidá a 63.614 persones.

Álvarez Alonso destacó que too indica que'l desemplegu va siguir creciendo. "El crecimientu ye altu y más significativu nel sector de la construcción con más 2.000 paraos nel últimu mes del añu", añadió.

"El progresivu deterioru del entornu financieru y económicu, tanto a nivel nacional como internacional, ta debilitando'l mercáu de trabayu na rexón y cada vez asusten más les perdes de puxu del sistema productivu", declaró José Luis Ávlarez Alonso, director del Serviciu Públicu d'Emplegu del Principáu.

N'avientu, el númberu de desemplegaos na rexón rexistró un incrementu de 5.363 persones sobre'l mes anterior, lo que significa un 9,21 por cientu más qu'en payares. Asina, la tasa de subida asturiana sobre payares dobla la rexistrada a nivel nacional (4,67%) y posiciona a Asturies como la tercer comunidá con una mayor tasa de subida de paru, sólo per detrás de Navarra (9,24%) y de La Rioxa (9,61%).

"L'aumentu del desemplegu nel sector de la construcción ye mui preocupante, siguíu de cerca pol sector industrial, per otra parte existe una moderada satisfaición en cuanto a los datos algamaos referentes al sector servicios", señaló Álvarez Alonso.