UVIÉU, 13 Oct. (EUROPA PRESS) -
La conseyera de Desenvolvimientu Rural y Recursos Naturales, María Jesús Álvarez, manifestó esti xueves que "2017 va ser un añu históricu pa la Denominación d'Orixe Protexida (DOP) Sidra d'Asturies" porque hubo "un pasu de xigante cola incorporación de 54 variedaes de mazana nueves, lo que permite integrar na marca tola sidra natural ellaborada con mazana asturiana".
La conseyera resaltó qu'esti fechu súmase a la unión d'ocho llagares nueves, y en particular, a la inclusión de productores de la denominada "sidra selección".
La responsable de mediu Rural indicó que dende la so área impulsóse "con decisión esti proyectu col cambiu del pliegu de la DOP pa incorporar les variedaes nueves y el so rexistru nel Ministeriu d'Agricultura".
Álvarez facía estes declaraciones mentes la visita que realizó esti xueves al Festival de la Mazana de Villaviciosa. "El procesu va siguir cola incorporación progresiva de más variedaes, una vez determinaes pol comité técnicu, les alministraciones y les autoridaes científiques, col fin d'algamar un volume de producción que, nun llustru, permita consolidar cifres estratéxiques y determinantes", añadió.
La conseyera señaló qu'esti proyectu ye'l resultáu "d'un procesu llargu de negociación y alcuerdu nel que participaron llagareros y productores, siempres col apoyu y collaboración de la conseyería".
La incorporación de llagareros a la DOP Sidra d'Asturies y de les variedaes de mazana nueves va suponer una "perimportante medría nel mercáu" de botelles de sidra con "peralta calidá", depués del récord de ventes del pasáu añu cuando medraron un 10%, cuasi dos millones de botelles.
Asina, la crecedera nesta bébora singular ye "cualitativo y cuantitativo nun momentu en que Sidra d'Asturies ye una realidá puxante, viva y n'espansión", precisó la conseyera.
