UVIÉU, 15 Ene. (EUROPA PRESS) -
El Gobiernu del Principáu presentó esti sábadu les doce pintures pertenecientes a la serie de la monarquía asturiana que foron apocayá restauraes pa poder vese en perfectu estáu nel Muséu de Cuadonga, xunto los otros cinco cuadros que completen el conxuntu. A la presentación asistieron los conseyeros de Presidencia y Participación Ciudadana, Guillermo Martínez, y d'Educación y Cultura, Genaro Alonso.
La intervención, fecha por restauradores nos talleres del Muséu de Cuadonga, foi impulsada pola Conseyería d'Educación y Cultura y ta enmarcada dientro de los actos de los centenarios vinculaos a Cuadonga que se conmemoren anguaño: el XIII centenariu de los oríxenes del Reinu d'Asturies, un sieglu de la creación del Parque Nacional del Monte de Cuadonga, anguaño Picos d'Europa, y el primer centenariu de la coronación canónica de la Santina.
En nota de prensa, Martínez destacó "el trabayu conxuntu realizáu pol Gobiernu d'Asturies, l'Arzobispáu d'Uviéu y al Conceyu de Cangues d'Onís pa poner a disposición de la sociedá asturiana y española un exemplar y variáu programa d'actividaes vieno del consensu y de la collaboración institucional, na que'l so diseñu tamién llogremos la implicación d'otres entidaes públiques y privaes".
En concreto, programáronse yá 80 actos de calter institucional, cultural y llitúrxicu, amás de diverses acciones en materia de promoción turística. Tamién ta prevista una inversión de 746.000 euros nel llanzamientu d'una campaña específica d'espardimientu y distintes actividaes de promoción y patrociniu.
Pa logar la implicación máxima de toles instituciones y tamién del sector priváu, el grupu de trabayu creáu pa la organización de los eventos va empecipiar una ronda nueva de contactos con representantes del sector hosteleru y hoteleru d'Asturies y con toes aquelles persones y entidaes que cola so collaboración puen contribuir al éxitu de Cuadonga Centenarios 2018.
RESTAURACIÓN PICTÓRICA
La Conseyería de Cultura invirtió 43.000 euros nel procesu de restauración de les obres presentaes, que duró cuatro meses y que tuvo supervisáu en too momentu polos técnicos del Muséu del Prado. Les 17 pintures pertenecen a la serie cronolóxica de los Reis d'España, tán depositaes pol Muséu Nacional del Prado nel Muséu de Cuadonga y constitúin ún de los conxuntos pictóricos más emblemáticos de los existentes n'Asturies.
Nel repasu histórica sobre'l conxuntu pictóricu, Alonso recordó que les pintures nunca llegaron a esponese nel Muséu del Prado, y que'l primer depósitu realizáu en 1884 nel Ministeriu de Marina correspondió, precisamente, al conxuntu de los reis d'Asturies.
El conseyeru d'Educación y Cultura recordó que'l proyectu encamentáu por Isabel II a José Madrazo en 1847, consistía en realizar la xenealoxía pictórica de los sos antepasaos reales "con un evidente sentíu políticu de llexitimación de los sos derechos", y pormenorizó'l percorríu de la serie artística dende la so llegada a Asturies hasta'l so allugamientu actual nel Muséu de Cuadonga.
