El Principáu saca a información pública'l protocolu nuevu d'actuación n'episodios de contaminación atmosférica

Ría Avilés, industria.
EUROPA PRESS
Actualizado: viernes, 17 noviembre 2017 10:59

UVIÉU, 17 Nov. (EUROPA PRESS) -

La Conseyería d'Infraestructures, Ordenación del Territoriu y Mediu Ambiente sacó esti vienres a información pública nel Boletín Oficial del Principáu (Bopa) el protocolu nuevu d'actuación n'episodios de contaminación atmosférica.

El Gobiernu d'Asturies ratifica con esti documentu'l so compromisu cola calidá del aire y la protección de la salú, porque la so activación nun implica necesariamente qu'exista un riesgu de superación de los valores llendaos de partícules en suspensión menores de 10 o 2,5 micres (PM10 y PM 2,5) regulaos pola llexislación ambiental vixente.

El testu, que recueye les actuaciones de cada alministración pública énte episodios puntuales de medría de la contaminación del aire en situaciones d'estabilidá atmosférica, establez trés tipos d'escenariu: unu preventivu o nivel 0, que se va activar ensin llegar a les llendes consideraes episodios de contaminación atmosférica, y dos más que se van aplicar cuando se superen estos valores.

Tanto les alministraciones como les entidaes privaes rellacionaes van adoptar cuatro tipos d'actuaciones que van afectar al conxuntu de la zona na que s'allugue la estación que rexistre valores d'activación del protocolu.

Estes actuaciones son informatives y van dir dirixíes a la población, a les autoridaes competentes, a los servicios de salú y atención sanitaria y a les empreses allugaes na área concreta, con encamientos y información sobre les midíes que s'apliquen y l'evolución de la calidá del aire.

Tamién se van realizar actuaciones de tráficu, coles que se preven restricciones na circulación y l'establecimientu de llendes de velocidá y midíes pa fomentar l'usu del tresporte públicu.

Per otru llau, va haber actuaciones específiques pal sector industrial y otres empobinaes al sector servicios y al ámbitu institucional.

El protocolu sometióse a un procesu de participación, nel que la conseyería caltuvo contactos colos 16 conceyos de les árees afectaes (Uviéu, Xixón, Avilés, Noreña, Siero, La Ribera, Llanera, Morcín, Gozón, Corvera, Castrillón, Carreño, Mieres, Llangréu, Samartín del Rei Aurelio y L.lena), la Delegación del Gobiernu, la Delegación Territorial de l'Axencia Estatal de Meteoroloxía y la Dirección Xeneral de Tráficu.

Asturianu ofrecido por