UVIÉU, 16 d'Avientu (EUROPA PRESSS)
Los máximos responsables del Colexu Oficial d'Inxenieros Técnicos d'Asturies (Citipa) y del Colexu Oficial d'Inxenieros n'Informática (Coiipa) nun ven lóxico qu'un error informáticu seya la causa de caltener paralizada, dende abril del 2013, la publicación de memories per parte del Ente de Servicios Tributarios del Principáu d'Asturies. El plazu trescurríu, dixeron, resulta "escesivu".
Los profesionales entienden que la causa más probable de que trescurriera tantu tiempu sin que se diera solución al asuntu "debe de tar más bien relacionada colos procesos de toma de decisión y la disponibilidá de recursos que con aspectos puramente técnicos".
La última memoria publicada foi la relativa al 2010. La conseyera de Facienda del Gobiernu d'Asturies, Dolores Carcedo, esplicó per escrito, a una pregunta del diputáu d'UPyD, Ignacio Prendes, que'l retrasu ye por cuenta de un error nel sistema informáticu que se detectó nesa fecha del 2013 y que se ta trabayando tovía pa igualu y publicar una nueva memoria.
Al pasu d'esa respuesta yá salió esti llunes el mesmu Prendes, que nun entiende qu'un error informáticu prollónguese tanto nel tiempu y preguntóse si detrás de les razones alegaes pol Gobiernu autonómicu pue haber daqué más.
Pela so parte, los decanos del Citipa y Coiipa, Oscar L. Castro y José García Fanjul respectivamente, esplicaron esti martes, a consultes d'Europa Press, que los profesionales informáticos avecen correxir dacuando fallos de sistemes y el plazu normal pa igualos, colos recursos necesarios, suel ser "de díes o selmanes".
Indicaron que si ye un fallu nel sistema, el fechu de que trescurriera un plazu de tiempu tan llargu sin que se corrixera "paez indicar que nun se dedicaron los recursos humanos o materiales pa la so corrección". Los fallos de software suelen resolvese en plazos de tiempu muncho más cortos.
Pero hasta nel casu nel que la respuesta que dio la Conseyería de Facienda nun fuera exacta, de forma tala que lo qu'asoceda nun seya un fallu nos sistemes sinón que los mesmos nun tengan la información o funcionalidá pa llograr los datos y ellaborar memories, lo normal diba ser que pudiera ponese en marcha un proyectu d'actualización de los sistemes o escoyeta de la información. "Otra vuelta'l plazu trescurríu, dende abril del 2013, paez escesivo", comentaron.
