UVIÉU, 24 de Marzu (EUROPA PRESS)
El conseyeru de Presidencia del Gobiernu asturianu, el socialista Guillermo Martínez, dixo esti vienres que nun-y paeció responsable la posición d'IU nel plenu de la Xunta Xeneral del Principáu d'Asturies (JGPA), onde la coalición apoyó una reprobación de la conseyera asturiana de Desarrollu Rural y Recursos Naturales, María Jesús Álvarez.
"Nun ye xusto facelo cola conseyera nin facelo a cuenta de les relaciones que'l Grupu Socialista caltién con IU", señaló Martínez, que dixo qu'eses relaciones sufrieron un deterioru evidente" y que yá "nun puen ser iguales" d'equí p'alantre nin col Grupu Socialista nin col Gobiernu d'Asturies.
La reprobación de María Jesús Álvarez apoyáronla tolos grupos nun siendo'l PSOE. Guillermo Martínez consideró "totalmente inxustificable" que'l promotor de la iniciativa fuera'l PP, cuando, según el socialista, foi esi'l partíu responsable directu del problema nel que se basaba la reprobación, el del despidu de veterinarios por un espediente de regulación d'empléu en Tragsa.
