UVIÉU, 21 May. (EUROPA PRESS) -
El portavoz del PSOE na Xunta Xeneral del Principáu, Marcelino Marcos Líndez, calificó esti llunes de "simplez" l'usu de símbolos como la bandera d'España por delles formaciones polítiques, como'l PP con líderes n'Asturies que participaron esti sábadu nuna xura de bandera civil en Cuideiru, y como Ciudadanos nel actu qu'entamó la formación d'Albert Rivera en Madrid pa presentar la so plataforma 'España ciudadana'.
Depués de la Xunta de Portavoces, el diputáu socialista criticó l'usu "fríu" de la bandera pa representar el calter de "españolidá" cuando, entiende, tendría qu'emplegase esi "arguyu de país" nun sentíu más ampliu dende les instituciones pa garantizar derechos como educación, sanidá o vivienda.
Pal parllamentariu del PSOE nun pue despreciase la existencia de la realidá complexa y con diversidá de problemes nel país, añadiendo que quien nun ve eso ye "miope". "Nun nos van atopar nesa simplez", dixo.
El portavoz d'IX na Cámara autonómica, Gaspar Llamazares, ve un "evidente" usu de los símbolos polos partíos de dereches, anque se pregunta por qué la identificación cola unidá del país faise dende la derecha y non con fuercies d'esquierdes "que defendan non namás la unidá política sinón tamién la unidá social". "Dalgo vamos tener que rectificar tamién", propón.
Per otru llau, la presidenta del PP asturianu, Mercedes Fernández, defendió la so presencia na xura de bandera civil de Cuideiru argumentando que se trata d'un "símbolu d'unidá" qu'hai que reivindicar "más que nunca col problema del separatismu" de Cataluña. "Si daquién quier ver manipulación electoral tien un seriu problema", apuntó.
Dende Ciudadanos, el so portavoz parllamentariu, Nicanor García, argumentó que la formación utiliza "la bandera constitucional pa reivindicar la 'España ciudadana'" frente al "movimientu anticonstitucional" que se vive en Cataluña. "Tamos arguyosos de ser españoles y de defendelo", remarcó, añadiendo que tendría que ser dalgo "normal" como asocede en "cualquier país d'Europa.
