El PSOE dexa en manes d'IU les conseyeríes de Gobernación, Turismu y Obres Públiques

SEVILLA, 2 de Mayu (EUROPA PRESS)

   PSOE-A y IULV-CA tienen prácticamente ultimáu l'organigrama del nuevu gobiernu de coalición que va dirixir la Xunta na nueva lexislatura, que va ver reducida la so composición a un máximu de diez conseyeríes --frente a les trece actuales--, trés d'elles en manes de la federación d'izqierdes, y que malpenes va incluyir 'cares nueves' al mandu de los departamentos que queden en menes socialistes, informaron a Europa Press fontes d'ambes formaciones.

   A la espera del alcuentru que tienen de celebrar delegaciones d'ambos partíos el próximu vienres pa zarrar la composición definitiva del nuevu Executivu, nel que podríen participar los sos respectivos líderes, José Antonio Griñán y Diego Valderas, IULV-CA va colocar al so coordinador xeneral al mandu d'una Vicepresidencia de la que va depender la Conseyería de Gobernación, previsiblemente sin les competencies de Xusticia, que pasaríen a otru departamentu.

   Les otres dos conseyeríes en poder d'IULV-CA seríen Turismu y Obres Públiques y Vivienda, que podría cambiar de denominación y que concentraría les competencies en materia d'ordenación del territoriu, una de les principales esixencies de la federación d'izquierdes mientres la negociación colos socialistes.

   Ún d'estos departamentos tendrá que lideralu una muyer pa cumplir col equilibriu de sexos anunciáu por Griñán pal conxuntu del Executivu. Ente los nomes que suenen con más fuerza como posible conseyera d'IULV-CA figura'l de la so responsable de Política Institucional, Elena Cortés.

ÁVILA VA SIGUIR LIDERANDO L'ÁREA ECONÓMICA

   Nes files socialistes diose por segura la continuidá d'Antonio Ávila, actual conseyeru d'Economía, Innovación y Ciencia, que podría asumir nueves competencies nel nuevu Executivu. Ávila forma parte del núcleu más directu de Griñán dende la so etapa como vicepresidente económicu y foi conseyeru de la Presidencia nel so primer gabinete.

   Delles fontes socialistes consultaes por Europa Press nun prevén demasiaes 'cares nueves' ente los conseyeros del PSOE-A de resultes de la reducción de conseyeríes y la irrupción d'IULV-CA como sociu de gobiernu.    

   Sicasí, otres fontes nun zarren la puerta a la entrada nel Executivu d'algún 'fichaxe' inesperáu, como yá asocediera cola incorporación de Rosa Aguilar, daquella alcaldesa de Córdoba con IU, como conseyera d'Obres Públiques nel primer gobiernu de Griñán.