UVIÉU, 25 de Mayu (EUROPA PRESS)
El Partíu Socialista ganó esti domingu les elecciones autonómiques n'Asturies, llogrando 14 de los 45 diputaos na Xunta Xeneral del Principáu, trés menos que nes elecciones de marzu del 2012. Sicasí, asítiase como la fuerza con más representación nel parlamentu asturianu a cierta distancia del PP, que con once escaños sube unu al respective de los últimos comicios y anuncia que va optar tamién a la Presidencia del Principáu.
Foro Asturies cayó de los 12 diputaos que tenía nesta pasada llexislatura a 3 escaños. Esta baxada ye especialmente significativa comparada colos 16 diputaos que llogró fai namás cuatro años, cuando nel 2011 foi'l partíu mayoritariu na Xunta Xeneral, lo que dexó gobernar a Francisco Álvarez-Cascos daqué menos d'un añu hasta que disolvió la Cámara pola falta d'apoyos a los sos presupuestos na que foi la llexislatura más corta de la democracia n'Asturies y que llevó a unes nueves elecciones nel 2012.
Relevante foi, coles mesmes, la irrupción de Podemos nel parlamentu asturianu, al llograr 9 diputaos. Pela so parte, Izquierda Unida llogró caltener la representación de los sos cinco escaños na Cámara autonómica.
Tamién entró na Xunta Xeneral Ciudadanos (C's) con trés diputaos, mientres qu'UPyD, que tenía un escañu nesta pasada llexislatura quedó sin representación.
Toles fuerces que yá taben representaes nel hemiciclu perdieron porcentaxe de votos, nun siendo'l PP, que subió lixeramente del 21,53% al 21,58% de los apoyos que-y valieron pa llograr un escañu más hasta los 11 diputaos.
Los socialistes pasaron d'un 32,02% a un 26,41% de los apoyos que-y dieron los sos 14 diputaos; Foru baxó del 24,83% al 8,22%; IU del 13,78 al 11,95%; y UPyD cayó del 3,75% al 0,8%, lo que-y torgó entrar na Xunta, puesto que ye necesario superar el 3% pa optar a un escañu.
Pela so parte, les fuerces emerxentes Podemos y Ciudadanos (C's) llograron entrar na Cámara asturiana con un 19,04% y un 7,13%, respectivamente.
Nestes elecciones autonómiques participaron 543.362 votantes, penriba de los datos rexistraos va trés años, cuando se contabilizaron 503.395 votantes que supunxeron una de les cifres más baxes yá qu'hubo un 44,08% d'astención. Esta vez, l'astención asitióse nel 37,82 por cientu, daqué superior, sicasí, a mayu del 2011, cuando s'asitió nel 33,11 por cientu.
PSOE Y PP ANUNCIEN QU'OPTEN A LA PRESIDENCIA
El candidatu socialista a la reelección, Javier Fernández, aseguró esti domingu que va intentar formar el "gobiernu estable" que precisa Asturies, pa lo que va tar abiertu a negociar con toles formaciones tres l'analís inicial que va facer la FSA-PSOE'l próximu miércoles. "Ganemos los socialistes n'Asturies", dixo na so primer intervención pública, asegurando que va gobernar "pa tolos asturianos".
Pero Javier Fernández paez que nun va ser l'únicu qu'opte a la Presidencia del Principáu, dao que la candidata del PP, Mercedes Fernández, tamién anunció esta nueche la so intención de presentar candidatura a la Presidencia.
Mercedes Fernández dixo que la razón principal de que'l PP, que tien 11 diputaos, nun ganara les elecciones ye "la fragmentación" del centru derecha liderada pol secretariu xeneral de Foru Asturies, Francisco Álvarez-Cascos, que se dedicó a "combatir" al PP. "Creo nos alderiques parlamentarios y Asturies merezse que formulemos un discursu y ofrezamos una opción distinta", esplicó.
Francisco Álvarez-Cascos, pela so parte, consideró como "negativos" los resultaos de Foru Asturies nes elecciones autonómiques yá que, pasar de 12 a 3 escaños, ta "bien lloñe de les aspiraciones" coles qu'acudía la so formación, encabezada por Cristina Coto.
Pela so parte, Gaspar Llamazares (IU), apostó por entendese con otres fuerces polítiques. "Tendemos la mano al diálogu, la negociación y l'acuerdu d'izquierdes n'Asturies", dixo en conociéndose que'l so partíu caltién los sos cinco diputaos.
"Esperamos que'l restu de les fuerces polítiques asturianes faigan lo mesmo y tean al altor de los ciudadanos", apuntó Llamazares, insistiendo en que los asturianos "nun quieren resignación nin cayente", sinón que quieren abrir una "nueva etapa política", daqué que tamién va asoceder, adelantó, en toa España. "Equí entama la Reconquista", atayó.
PODEMOS DEFENDE UN CAMBIU "IRREVERSIBLE"
La cabeza de llista de Podemos, Emilio León, aseguró esta nueche que "el cambiu ye irreversible". "Metimos un pie nesa puerta entreabierta que foi la participación ciudadana, y nun lu vamos mover", manifestó un eufóricu Emilio León na Escandalera, na so intervención al conocer los resultaos que-yos otorguen 9 diputaos.
"Pidimos l'ayuda del pueblu, y el pueblu nun mos falló. Pue tremecenos la voz pero nunca les piernes, porque tais ehí", manifestó la cabeza de llista de Podemos, qu'agoró que coles elecciones xenerales va llegar una nueva y mayor alegría tovía.
Tamién contentu mostróse la cabeza de llista de la candidatura de Ciudadanos a la Presidencia del Principáu d'Asturies, Nicanor García, que celebró que'l "cambiu sensatu" ganara "" n'Asturies, gracies a los trés escaños llograos pola so formación, ente ellos el d'Ignacio Prendes, diputáu d'UPyD na pasada llexislatura hasta la so renuncia a l'acta va escases selmanes, por diferencies cola dirección nacional del partíu de Rosa Díez, pa dempués sumase al proyectu d'Albert Rivera n'Asturies.
El candidatu d'UPyD, Adán Fernández, reconoció que los resultaos nun fueron positivos, al quedar fuera de la Xunta Xeneral señalando como una de les causes la resquiebra interna de la formación y la marcha de dellos de los sos miembros a Ciudadanos. "Intentar, dexemos la piel. Tenemos la cabeza alta, la conciencia tranquila", apuntó.
