UVIÉU, 24 de Xunetu (EUROPA PRESS)
La secretaria de Política Municipal de la Federación Socialista Asturiana (FSA-PSOE), Adriana Lastra, encamentó esti xueves a la presidenta del PP d'Asturies, Mercedes Fernández, qu'esclare darréu si tien algún criteriu coherente al respecto de les responsabilidaes polítiques de los sos cargos públicos, en relación a la negativa a dimitir per parte del edil del Conceyu d'Uviéu, Jaime Reinares, condenáu a un añu de prisión por delitos de revelación de secretos y violación de la intimidá.
Lastra tamién pide a Fernández qu'esplique si l'aplicación del códigu éticu del que presume'l PP depende del llibre criteriu de caún de los afectaos, como paez sacase en conclusión de les sos declaraciones.
La responsable socialista recuerda que'l 9 de xunetu, fai más de dos selmanes, conocióse'l fallu xudicial que condena a Jaime Reinares y que la dirección nacional del PP ye partidaria de que los militantes qu'ocupen cargos públicos dimitan nel momentu en que abrir xuiciu oral.
Destaca que "hasta agora la única midida que se conoz del PP respecto al casu Reinares ye l'adoptada pol alcalde d'Uviéu, Agustín Iglesias Caunedo, que decidió retira-y tolos sos cargos nel equipu de gobiernu llocal. De parte de la presidenta rexonal del PP namás s'escucharon reflexones vacíes, fuxíes palantre o salíes fuera de tonu: primero dixo que dexaba l'asuntu en manos del PP d'Uviéu; dempués, aseguró que Reinares sabría facer lo más conveniente; y agora caltien qu'hai que dexa-y tiempu pa qu'acabe la so reflexón personal'.
