PSOE y PP muestren la so confirmidá col anunciu de Catalá, mientres qu'IU y Foru falen de "retrasos y marxinación"

UVIÉU, 17 de Mayu (EUROPA PRESS)

El PP mostró güei la so satisfacción por que pue circulase pronto pela varriante ferroviaria de Payares, mientres que'l PSOE ve bien que la solución adoptada al final seya de tráficu mistu. Mientres, Foru considera que'l Gobiernu central marixna a Asturies y IU considera que l'alta velocidá retrasaráse hasta 2019 o'l 2020.

Asina lo señalaron representantes políticos d'estos grupos, dempués de que'l secretariu d'Infraestructura del Ministeriu de Fomentu, Rafael Catalá, anunciara la próxima licitación de la electrificación y la instalación de la vía, n'anchu ibéricu.

El voceru del PSOE na Xunta Xeneral del Principáu, Fernando Lastra, manifestó la so conformidá con que la opción escoyida pa la variante ferroviaria de Payares seya que circule tráficu mistu, ye dicir mercancíes y viaxes. A pesar de la "provisionalidá" del anunciu que realizó esti vienres Fomentu, Lastra dixo qu'esi tráficu mistu ye una necesidá" y una urxencia" pal desenvolvimientu económicu d'Asturies.

"Abren provisionalmente n'anchu ibéricu, lo que ta por ver y la reivindicación d'Asturies ye que caltenemos l'oxetivu de l'Alta Velocidá", señaló Lastra, que renunció a facer una reflexón crítica sobre esi asuntu, porque la decisión que s'anunció ye provisional.

Eso sí, dexó claro que, amás de la llicitación en xunetu, entá nun hai "nin hai plazos, nin hai concreciones, nin hai precisión". Nesti sen, dixo qu'espera que la visita de Catalá nun s'utilizara namás "pa salir del pasu".

Pela so parte, el diputáu de Foru na Xunta Xeneral d'Asturies (XXPA) Pelayo Roces, calificó de "una nueva agresión a Asturies" los planes anunciaos pol secretariu d'Estáu. Roces, en declaraciones a los periodistes nos pasiellos de la Xunta Xeneral criticó que Fomentu vaya a abrir namás qu'ún de los dos túneles pa tráficu mistu (pasaxeros y mercancíes) y amás n'anchu ibéricu (l'utilizáu por Renfe), que nun ye alta velocidá europea.

Al so xuiciu, esta nueva "marxinación" a Asturies per parte del Gobiernu central de Mariano Rajoy supón "un escándalu" nel que los perxudicaos vuelven ser los asturianos.

Pelayo Roces recordó que'l costu de la obra ye de 3.500 millones, una cantidá bien elevada pa qu'agora "se prostituya" el proyectu con trenes lentos que baxe la capacidá de la "llinia".

Consideró qu'Asturies nun va cuntar con alta velocidá como otros territorios, como sí pasa nes llinies Madrid-Sevilla, Madrid-Barcelona, o Madrid-Valencia, onde los trenes de mercancíes siguen circulando peles antigües llinies d'anchu ibéricu, y namás los trenes de viaxeros circulen pelos nuevu trazaos d'alta velocidá. "El Secretariu d'Estáu vieno firmar l'acta de defunción de l'alta velocidá p'Asturies", llamentó Roces.

EL PP CELÉBRALO

El voceru axuntu del PP na Xunta Xeneral del Principáu d'Asturies, Fernando Goñi, celebró l'anunciu porque "en breve podrá circulase pela variante de Payares, al poner en funcionamientu ún de los túneles", dixo en declaraciones a los periodistes nos pasiellos de la Xunta Xeneral d'Asturies.

Catalá esplicó esti llunes nuna visita a Asturies que se licitará en xunetu'l contratu de vía y electrificación, coles mires de poner en marcha ún de los dos túneles con tráficu mistu y de primeres con anchu ibéricu.

Goñi recordó que l'oxetivu final ye qu'Asturies cuente con alta velocidá y anchu internacional. "Cuanto antes s'abra, los tiempos van retayase", indicó'l dirixente 'popular', que dixo que lo importante ye que se siga trabayando. Tres insistir en que'l PP "cumple lo que promete", recordó que de primeres tamién l'autopista AP-66, qu'une Asturies con Lleón, abrir con un namás un túnel nel Güerna y "foi una meyora bien importante".

El diputáu del PP señaló que, en relación a la variante, por fin empieza "dicise la verdá", estimando que Fomentu alcontrara una solución pa poder dir poniéndola en funcionamientu cuanto antes, mientres se solucionen otros problemes.

El diputáu d'IU d'Asturies na Xunta Xeneral, Aurelio Martín, manifestó esti vienres que la visita del Secretariu d'Estáu "supón la constatación de que l'alta velocidá nun va llegar a Asturies hasta'l 2019 o l'añu 2020.

"Ye inaceptable dafechu, intolerable y inasumible" l'anunciu de Fomentu d'esta mañana de que va sacar a licitación en xunetu del equipamientu, pero d'un solu túnel y con anchu Renfe.

El diputáu responsable d'infraestructures d'IU afirma que'l Ministeriu de Fomentu escuende "detrás d'una xustificación técnica la falta real de compromisu políticu y presupuestariu del Gobiernu d'España y del Partíu Popular".

Martín alvierte que'l PP ta usando la xustificación del aislamientu de los túneles y, sicasí, nun hai nada nuevo que la Ministra nun conociera'l 15 de xineru, cuando yá aseguró nel Senáu que licitaría l'equipamientu en feches inminentes.

"La Ministra tendría qu'esplicar qué pasó ente xineru y mayu pa esti cambiu de posición, anque tamos convencíos de qu'esto tien más que ver coles dificultaes presupuestaries y l'ausencia de voluntá política que con problemes técnicos", señala'l diputáu d'IU, y añede que "nin na comparecencia d'Ana Pastor nel senáu nin nes declaraciones de Mercedes Fernández falóse nunca de que fueren abrir namás un túnel, sinón de dar continuidá a la obra tal como taba plantegada".

Martín tamién recuerda que la Variante tien qu'abrir con tráficu mistu. "Nun podemos permitimos el luxu d'esta inversión namás pa pasaxeros, porque les nueses empreses precisen tresportar les sos mercancíes per una infraestructura competitiva, y non per un trazáu pel que namás pue circulase a 50 kilómetru por hora, como la vía de Payares del sieglu XIX", esplica.

A lo último, Martín va esixir que se ponga en marcha un frente políticu, social y empresarial, "llámese Plataforma pro Variante o como se llame", pa dicir un non atayante, pa que'l Ministeriu faiga un relatu temporal distintu dafechu. "Ye un retrasu inalmitible pa l'alta velocidá n'Asturies", acaba'l diputáu d'IU.