El PSOE ve posible l'albuertu llibre hasta 12 o 14 selmanes y piensa que'l TC pue ser más "flexible na llei de plazos"

MADRID, 29 d'Avientu (EUROPA PRESS)

El secretariu xeneral del Grupu Parlamentariu Socialista nel Congresu, Ramón Jáuregui, piensa que ye "una hipótesis más que posible", que'l Gobiernu proponga una llei que permita l'albuertu "llibre, ensin exixencies de supuestos, nes primeres 12 o 14 selmanes" d'embaranzu.

Nuna entrevista con Europa Press, Jáuregui opininó amás que'l Tribunal Constitucional, qu'en 1985 emitió una sentencia contraria a una llei de plazos, diba facer güei "una interpretación más flexible y más actualizada d'esti conflictu", ente'l derechu de la madre y el derechu del 'nasciturus'.

Asina, dexó claro que nun-y preocupaba que'l PP decidiere recurrir antel Tribunal Constitucional la futura llei. "Ye posible que tengamos una nueva sentencia y nun me paecía mal porque la sentencia de 1985 respuende a un contestu igual que'l de 23 o 25 años dempués", esplicó.

Jáuregui caltuvo que "una nueva sentencia del Constitucional" nun tien por qué ser un inconveniente", y se mostró d'acuerdu col catedráticu de Derechu Constitucional Javier Pérez Royo al afirmar que la "evolución sociolóxica mui importante" que vivió España nos últimos 25 años pue facer que nuna fecha como'l 2010 el TC "puea tener un criteriu más flexible de la compatbilidá ente'l derechu de la madre y el derechu del nasciturus".

"Pienso que si eso se produxere, si l'asuntu llegare al Tribunal, cabe esperar una interpretación más flexible y más actualizada d'esi conflictu", apuntó.

Sicasí, nun adelantó más detalles sobre otros puntos de la próxima reforma de la llei del albuertu y recordó que la subcomisión parlamentaria va acabar el so trabayu nel mes de xineru o febreru y va elevar un informe p'aportar al Gobiernu posibles llinies de reforma, igual que'l comité d'espertos que va asesorar al Executivu.

Per otru llau, afirmó qu'al Gobiernu va lleva-y tiempu presentar un borrador de reforma de Llei Orgánica de Llibertá Relixosa (LOLR) porque "ye una llei delicada que requier munches consultes, munchos trabayos previos y muncha prudencia", anque recordó que l'asuntu depende de la vicepresidenta primera, María Teresa Fernández de la Vega.

Opinó que nun va ser "elementu nuclear" de la próxima llei'l regular si debe haber o non crucifixos y otres manifestaciones relixoses nes escueles. "L'usu de los símbolos ye una cuestión simbólica, nun ye menor pero nun pienso que seya l'elementu nuclear", esplicó.