UVIÉU, 19 Jun. (EUROPA PRESS) -
El PSOE votó en contra de la enmienda de Compromís pa incluyir nel proyectu de los Presupuestos Xenerales del Estáu (PXE) una partida de 100.000 euros pa l'Academia de la Llingua pol compromisu de Pedro Sánchez de nun modificar los presupuestos del PP yá aprobaos nel Congresu.
Asina lo indicaron fontes socialistes a Europa Press, que recordaron el compromisu mostráu por Pedro Sánchez nel debate de la moción de censura, onde se comprometió a nun modificar los presupuestos por responsabilidá y compromisu d'Estáu.
Nesi sentíu, señalaron qu'esa promesa llevó a votar en contra de midíes que nel so momentu foron propuestes pol PSOE, ente les qu'asitien a esta.
Asina, recordaron que'l 4 de mayu en Xixón, les diputaes nacionales pol PSOE María Luisa Carcedo y Natalia González y el senador Vicente Álvarez Areces presentaron les enmiendes socialistes a los PXE qu'afectaben al Principáu.
En total, les enmiendes alzaríen a 443 millones d'euros la inversión prevista n'Asturies, de los 232 millones d'euros qu'aparecíen nesi momentu. Ente elles taba una de 250.000 euros pa l'Academia de la Llingua Asturiana, que foi refugada pol PP nel Congresu.
El Senáu volvió refugar esti llunes una enmienda asemeyada, agora tamién colos votos del PSOE, impulsada por Compromís pa incluyir nel proyectu de los PXE una partida de 100.000 euros pa l'Academia de la Llingua.
Según informó Compromís al traviés d'una nota de prensa, tolos senadores asturianos, seis en total, votaron en contra de la iniciativa. Trátase de Fernando Goñi, Mario Arias y Ovidio Sánchez pol PP; María Luisa Carcedo y Vicente Álvarez Areces pol PSOE y Rosa María de Posada por Foru.
Votaron a favor Compromís, Unidos Podemos, ERC, Bildu y una senadora non adscrita, astuviéronse PDCAT, Coalición Canaria, PNV y Nueva Canaria.
