UVIÉU, 25 Sep. (EUROPA PRESS) -
El 1 d'ochobre próximu y dientro del Día de la Reciella va celebrase la II Entaína, una carrera familiar y popular que va salir a les 11.30 de la mañana nel Muséu del Pueblu d'Asturies de Xixón y que tien como oxetivu celebrar la tresmisión interxeneracional de la llingua asturiana. Nesi sentíu, la carrera va homenaxear a la familia del músicu Nacho Fonseca.
La primer edición de la Entaína celebróse nel 2016 y tien un formatu de marcha d'un quilómetru, a la que se xunen nesta segunda edición 3 categoríes pa neños y neñes de distintes edaes, de 150, 250 y 400 metros. La inscripción puede facese na web de l'asociación Reciella (www.reciella.org) y tien un costu de 3 euros pa los mayores d'edá y de 2 euros para menores d'edá.
Una de les característiques de la carrera, que tien calter festivu, ye qu'una familia tolos años conviértese en protagonista, como exemplu de la tresmisión del asturianu d'unes xeneraciones a otres y como una garantía de futuru pal idioma. Pa esto, parte de los miembros de la familia escoyida cuerren con un testigu que se va pasando ente los miembros de la mesma.
Anguaño la familia que va llevar el testigu ye la familia Fonseca, na que Nacho Fonseca va pasar el testigu a la so fía Esther y ésta a la so fía Manuela. Nacho Fonseca ye una referencia pa la tresmisión del asturianu; una de les sos múltiples aportaciones foi la creación de Xentiquina, un coru infantil con interpretaciones que pertenecen yá a la memoria colectiva de Asturies. La so fía Esther siguió tamién los sos pasos nel campu de la comunicación y la música.
