La reforma llaboral pue "raspiar" la inconstitucionalidá, según un xuez del Supremu

MADRID, 25 de Mayu (EUROPA PRESS)

El presidente de la Sala IV de lo Social del Tribunal Supremu, Gonzalo Moliner, señaló que'l periodu de prueba d'un añu del nuevu contratu indefiníu qu'introduz la reforma "pue rayar la inconstitucionalidá, dao que la Carta Magna reconoz el derechu al trabayu y a la continuidá nél, esto ye, a que nun te despidan sin causa xusta".

Mientres la so intervención na segunda xornada de la 'XII Asamblea Nacional de Xuntes de Gobiernu de Colexos Oficiales de Graduaos Sociales', Moliner afirmó que la reforma llaboral produz "un desequilibriu" na relación ente'l trabayador y l'empresariu, "y devalúa'l derechu del trabayu en sí mesmu".

El maxistráu esplicó que la nueva lexislación llaboral provoca una "importante limitación de l'autonomía sindical, lo que supón una devaluación del derechu del trabayu en cuanto derechu compensador de les desigualdaes".

Sicasí, el presidente de la sala de lo penal del Tribunal Supremu resaltó que la reforma "nun pue descalificase sin más, dao que se produz nun momentu de crisis económica brutal, y ye posible qu'esta situación xustifique una normativa d'igual gravedá pa compensala". Sicasí, Moliner nun aseguró que la nueva normativa "puea contribuyir d'alguna manera a salir de la crisis".

Per otru llau, Moliner cree que d'equí p'alantre les causes de despidu van ser "indeterminaes abondo como pa crear rocea y inseguridá". Según el maxistráu, antes había qu'acreditar el motivu de despidu y xustificalu, "mientres qu'agora esa esixencia queda limitada a que la decisión tea rellacionada con problemes xenéricos de competitividá, productividá o organización, con independencia de que con ello se contribuya a meyorar la situación de la empresa".