Refugu de los sindicatos asturianos a los planes de Ribera pa la descarbonización

Teresa Ribera
EUROPA PRESS - Archivo
Publicado 14/06/2018 14:26:43CET

UVIÉU, 14 Jun. (EUROPA PRESS) -

Los secretarios xenerales de los sindicatos CCOO y UXT n'Asturies, José Manuel Zapico y Javier Fernández Lanero respectivamente, mostraron esti xueves el so refugu a los planes de la ministra pa la Transición Ecolóxica, Teresa Ribera, sobre'l procesu de descabornización.

A entrugues de los periodistes depués de participar nuna concentración n'Uviéu, Fernández Lanero dixo que les palabres de la ministra raspien mesmo "la falta de respetu" hacia Asturies. Nun entiende la "priesa" de Ribera pa cerrar les centrales térmiques.

Solicita que concrete lo que significa esi términu qu'utiliza de 'transición xusta', por que tarrez que signifique la tresferencia de "cuatro duros" pa que la xente "calle la boca". Dende UXT, alvirtió nun van consentir que se siga esi camín "ensin poner alternativa enriba de la mesa".

D'esta forma, dixo que los Valles Mineros nun puen quedar "tiraos", ensin nengún tipu d'alternativa industrial, polo que fixo un llamamientu a Ribera pa que visite Asturies y conoza la problemática de primera mano. Fernández Lanero tamién demanda informes técnicos, porque los qu'existen hasta agora señalen que prescindir del carbón va significar un encarecimientu de la eletricidá.

"El país qu'arrenuncia a tener fontes d'enerxía propies ta arrenunciando a parte de la so soberanía; el gobiernu de Pedro Sanchez nun pue cometer esi erru", dixo, per otru llau, José Manuel Zapico, de CCOO.

Zapico considera necesario articular nel Principáu un "frente políticu y social ampliu" que defenda los intereses de los asturianos en materia enerxético, dalgo que pasaría pol caltenimientu del carbón nel 'mix'.

"El carbón autóctono tien que siguir xugando un papel importante", señaló, aportunando na necesidá de dialogar cola ministra.

Un procesu precipitáu de descarbonización namás sirviría, alvirtió, pa que'l gas tenga un mayor protagonismu, dalgo que "nun contribúi a la llucha contra'l cambiu climáticu y encarez el preciu de la eletricidá, pa les families y pa les empreses".