UVIÉU, 6 de Mayu (EUROPA PRESS)
Personalidaes de los entornos académicu, políticu y cultural tomaron parte esti miércoles na llectura institucional de 'L'inxeniosu fidalgu Don Quixote de La Mancha', versión en llingua asturiana de la famosa obra de Cervantes, roblada pol filólogu Pablo Suárez y acabante de publicase.
Responsables del Executivu autonómicu, como'l viceconseyeru Alejandro Calvo, la directora xeneral de Política Llingüística, Ana López Fueyo, o la directora xeneral d'Inmigración, Begoña Serrano; y diputaes como María del Mar García Poo (Foru Asturies) o Marta Pulgar (IX), tomaron parte nel actu.
Tamién lleyeron la presidenta de l'Academia de la Llingua, Ana Cano; el vicerrector d'Estensión Universitaria, Vicente Domínguez, la decana de la Facultá de Filoloxía, Cristina Valdés, y el profesor Ramón d'Andrés. Ente los escritores participantes, tuvieron Esther Prieto y Vanessa Gutiérrez, amás de músicos, como Xune Elipe, vocalista de Dixebra.
'L'ixeniosu fidalgu Don Quixote de La Mancha', primer versión n'asturianu del 'Quixote' de Cervantes, ta editáu por Ediciones Laria y compónse de dos tomos. Inclúi tamién una reseña histórica de l'Asturies de la época na que ta ambientada la novela.
